سێ وڵاتی دیکەی عەرەبی دەیانەوێت پەیوەندییەکانیان لەگەڵ ئیسرائیل ئاسایی بکەنەوە
SNN
میدیا ئیسرائیلییەكان ئاشكرایان كرد، دوابەدوای رێككەوتنی ئیسرائیل و ئیمارات سێ وڵاتی تری عەرەبی دەیانەوێت پەیوەندییەكانیان لەگەڵ ئیسرائیل ئاسایی بكەنەوە.
ئۆرشەلیم پۆست لە زاری چەند سەرچاوەیەكی باڵا لە حكومەتی ئیسرائیل ئەوەی خستووەتەڕوو، ئێستا لە هەموو كاتێك زیاتر وڵاتانی بەحرەین و میرنشینی عومان و سودان دەیانەوێت هاوشێوەی ئیمارات پەیوەندییەكانیان لەگەڵ ئیسرائیل ئاسایی بكەنەوە.
رۆژنامەکە نوسیویەتی، بەشێکی زۆری وڵاتانی عەرەبی ئەو رێككەوتنە بە هەنگاوێكی گرنگ و ئەرێنی وەسف دەكەن.
ئەوەشی خستووەتەڕوو، تێڕوانینی ئەو وڵاتانە بۆ ئیسرائیل گۆڕانكاری بەسەردا هاتووە، ئێستا بەرپرسانی بەحرەین و میرنشینی عومان و سودان، تەلئەبیب بە هاوپەیمانێكی نزیكی خۆیان دەزانن، بەتایبەت لەپێناو بەرەنگاربوونەوەی هەژموونی وڵاتانی ئێران و توركیا لە ناوچەكەدا.
دوێنێ پێنج شەممە بنیامین ناتانیاهو سەرۆكوەزیرانی ئیسرائیل و محەمەد بن زاید شازادەی جێنشینی ئەبوزەبی پەیوەندییەكی تەلەفۆنییان ئەنجامدا و لەسەر ئاساییكردنەوەی تەواوی پەیوەندییەكانی نێوانیان گەیشتنە ڕێككەوتن، دوابەدوای ڕاگەیاندنی ڕێككەوتنەكە، دۆناڵد ترەمپ سەرۆكی ئەمریكا رێككەوتنەكەی بە (مێژوویی) ناوبرد.
