“تەقەكردن لە خۆپیشاندەرانی هەڵەبجە لەلایەن پاسەوانەکانی لقی 12ی پارتییەوە پێچەوانەی یاسایە”
SNN-عەلی حەمە سەعید
دوای ئەوەی شەوی رابردوو لەلایەن پاسەوانانی لقی 12ی پارتییەوە تەقە لە خۆپیشاندەرانی هەڵەبجە كرا، جێگری سەرۆکی لیژنەی ناوخۆ لە پەرلەمانی کوردستان رایگەیاند: “تەقەكردن لە خۆپیشاندەران كارێكی تەواو هەڵەیە و پێچەوانەی یاسایە”.
باڵامبۆ محەمەد، جێگری سەرۆكی لیژنەی ناوخۆ و ئاسایش و ئەنجومەنی خۆجێییەكان لە پەرلەمانی كوردستان بە SNNی راگەیاند: “ئەگەرچی خۆپیشاندانی هاووڵاتییان و داواکردنی مافەکانیان كارێكی رێگەپێدراوە، بەڵام ئەوەی شەوی رابردوو لە هەڵەبجە روویدا بە هێرشكردنە سەر بینای حكومی و سوتاندنی چەند فەرمانگەیەك كارێكی نەشیاو بوو، چونكە داواكردنی ماف بە سوتاندنی ئەو فەرمانگە حكومییەكانە وەرناگیرێتەوە ،جگە لەوەی خودی هاووڵاتییان زەرەرمەند دەبن”.
ئاماژەی بەوەشكرد: “لە خۆپیشاندانی شەوی رابردووی هەڵەبجە لەلایەن پاسەوانی لقی 12ی پارتی تەقە لە خۆپیشاندەران کراوە ئەمەش كارێكی تەواو هەڵەیە و پێچەوانەی یاسایە، چونكە ناكرێت داواكردنی ماف و ئەنجامدانی خۆپیشاندان بە گولە وەڵام بدرێنەوە، ئەوەشی دەوترێت سەرەتا لە لایەن خۆپیشاندەرانەوە تەقەكراوە، ئەگەر وابێت ئەمەش هەر هەڵەیە و پێچەوانەی یاسایە بەڵام وەڵامدانەوەی هەر بە تەقە ئەوەش جارێكی دیكە هەڵەیەكی دیكەیە و نەدەبوو پاسەوانانی ئەو بارەگا حزبییە تەقە لەخۆپیشاندەران بكەن”.
ناوبراو ئەوەشی خستەڕوو: “دەبێت لایەنە پەیوەندیدارەكان لە هەڵەبجە لێكۆڵینەوەكانیان لەم بارەیەوە دەستپێبكەن و بۆ ڕای گشتی روونبكەنەوە هۆكاری تەقەكردن لە خۆپیشاندەران و دواتر سوتاندنی دامودەزگاحكومییەكان بەچ شێوەیەك بووە و كەسانی بەرپرس لەوكارە رووبەڕووی یاسا بكرێنەوە”.
شەوی ڕابردوو خۆپیشاندانی بەشێك لە هاووڵاتییانی هەڵەبجە بەڕێوەچوو، ژمارەیەک لە بەشداربووانی خۆپیشاندانەکە هێرشیانکردە سەر بەشێک لە دامودەزگا حكومییەکانی ئەو شارە و سەرۆكایەتی شارەوانی و بنكەی هاتووچۆ سوتێندران، هەریەكە لە قایمقامیەت و پۆلیسی هەڵەبجەش زیانیان بەركەوت، هەرچەندە خۆپیشاندەران ویستیان بەرەو لقی 12ی پارتی بڕۆن بەڵام لەلایەن پاسەوانانی ئەو بارەگایەوە تەقە لە خۆپیشاندەران كرا.
