پۆلیسی ڕاپەڕین لە بارەی ژمارەی خۆپیشاندەرە دەستگیرکراوەکان روونکردنەوە دەدات

SNN-محەمەد مستەفا

پۆلیسی ڕاپەڕین دەڵێت: بەشێک لە میدیاکان و لە تۆڕە کۆمەڵایەتییەکانیش، هەواڵێکی ناڕاستیان لەبارەی ژمارەی خۆپیشاندەرە دەستگیرکراوەکان بڵاوکردووەتەوە کە گوایە ژمارەیان 50 کەس دەبێت.

شۆڕش ئیسماعیل وتەبێژی پۆلیسی ڕاپەڕین بە SNN ی راگەیاند: لە لایەن کۆمەڵێک میدیا و تۆڕەکۆمەڵایەتییەکان وا بڵاوکراوەتەوە کە 50 خۆپیشاندەر لە لایەن هێزە ئەمنییەکانی ڕاپەڕینەوە دەستگیرکراون، بەڵام سەرجەم ئەو دەنگۆ و هەواڵانە دوورن لە راستیەوە .

وتیشی: لە ماوەی 10 رۆژی خۆپیشاندانەکانی ڕاپەڕین و بە تایبەت قەزای ڕانیە لە لایەن هێزە ئەمنیەکانەوە 12 کەس دەستگیرکراون لە ئێستاشدا بە بڕیاری دادوەر لە بەشی گرتن و گواستنەوەی پۆلیسی ڕاپەرین راگیراون. ”

باسی لەوەشکرد: دەستگیرکراوەکان بە مادەی 10 لە یاسای رێکخستنی خۆپیشاندان دەستگیرکراون و لە ئێستادا دۆسیەکانیان لە دادگایە و دادوەر بڕیار لەسەر دۆسیەکانیان دەدات .

هەفتەی رابردوو بەشێک لە هاووڵاتییانی ڕانیە دژی خراپی گوزەرانیان و دواکەوتنی مووچە خۆپیشاندانیان ئەنجامدا.