خوێندنی باڵا لەبارەی دەستپێکردنەوەی خوێندنی زانکۆ و پەیمانگاکان کۆبووەوە

SNN

ئەمڕۆ ئەنجومەنی وەزارەتی خوێندنی باڵا و توێژینەوەی زانستی کۆبووەوە و تیایدا پێشنیارکرا سەرەتای مانگی 10 خوێندنی زانکۆ و پەیمانگاکان دەستپێبکاتەوە.

بە گوێرەی زانیارییەکانی SNN، ئەنجوومەنی وەزارەت پێشنیازیکرد بۆ ساڵی خوێندنی 2020-2021 سیستمی خوێندنی تێکەڵاو پەیڕەوبکرێت و پێشنیازیشکراوە سەرەتای مانگی 10 خوێندنی زانکۆ و پەیمانگاکان دەستپێبکاتەوە.

د. عەبدولفەتاح عەبدولڕەزاق، بریکاری وەزارەتی خوێندنی باڵا و توێژینەوەی زانستیی هەرێمی کوردستان رایگەیاند “پێشنیازکراوە کە کۆتایی مانگی 9 و سەرەتای مانگی 10 دەوامی زانکۆ و پەیمانگەکان بۆ ئەمساڵی خوێندن دەستپێبکاتەوە”.

بریکاری وەزارەتی خوێندنی باڵا و توێژینەوەی زانستیی هەرێمی کوردستان ئاماژە بەوەش دەدات، سیستمی خوێندنی تێکەڵاو بەوجۆرەیە کە ئەو کۆلێژ و بەشانەی وانەی پراکتیکییان هەیە دەگەڕێنەوە کەمپی زانکۆ و پەیمانگەکان ئەوانەشی وانەکانیان تیۆرین بەشێوەی ئەلیکترۆنی و ئۆنلاین دەبێت.