لە خانەقین داعش لە یەک مانگدا 24 سەرباز و هاووڵاتى کردووەتە قوربانى

SNN- سیروان حەسەن

بەپێى ئامارێک لە ماوەى تەنیا یەک مانگى رابردوو لە سنوورى خانەقین، چەکدارانى داعش زیاتر لە 10 کردەوەى تیرۆرستییان ئەنجامداوە و بەهۆیەوە 24 سەربازو چەکدارى حەشد و هاووڵاتى مەدەنى بوونەتە قوربانى.

بەپێى ئامارێک کە SNN لە لایەنە ئەمنییەکانی خانەقینەوە دەستى کەوتووە، لە ماوەى یەک مانگى رابردوودا لە سنوورى خانەقین چەکدارانى داعش زیاتر لە 10 کردەوەى تیرۆریستى و پەلامارى بۆ سەر هێزەکانى سوپاى عێراق و چەکدارانى حەشدى شەعبى و هاووڵاتیانى مەدەنى ئەنجامداوە.

بەپێى ئامارەکان زۆربەى کردەوەکانى داعش لە سنوورى گوندەکانى نێوان خانەقین بۆ جەلەولا بووە و هەندێکیشى لە قەرەتەپەو سەعدییە بووە و بەهۆیانەوە نۆ کەس کوژراون کە بریتین لە فەرماندەیەکى حەشد و چەکدارێکى حەشدى شەعبى، دوو سەربازى سوپاى عێراق و پێنج هاووڵاتى مەدەنى.

هاوکات، 12   سەربازو چەکدارى حەشد لەگەڵ سێ هاووڵاتى برینداربوون. هەروەها سێ هاووڵاتیش لە گوندێکى ناحیەى قەرەتەپە رفێندراون و تاوەکو ئێستا چارەنووسیان نادیارە.

هەر لەو مانگەدا چەکدارانى داعش لەڕێگەى هاوەنەوە بۆدومانى چەند ناوچەیەکى سنوورەکەى کردووە و چەند جارێکیش رووبەرووى هێزە ئەمنییەکان بوونەتەوە جگە لە زیانى گیانى زیانى مادی زۆری داوە و ژمارەیەک گوندیش بەهۆیەوە چۆڵ بوون بە تایبەتى گوندە کوردەکانى سنوورى خانەقین.

بە پێى بەداوداچوونەکانى SNN لە ماوەى دوو مانگى رابردووشدا لە کۆى ئەو هەموو جموجۆڵ و پەلامارەى داعش تەنیا یەک چەکدارى داعش کوژراوە و تەرمەکەى کەوتووەتە دەستى حەشى شەعبى ئەویش لە سنوورى گوندى شێرک بووە لە نزیک خانەقین.