وەزارەتی تەندروستی هەڵمەتێکی هۆشیاری بۆ خۆپاراستن لە کۆرۆنا رادەگەیەنێت

SNN- مەودا مستەفا

وه‌زیری ته‌ندروستیی حکومەتی هەرێمی کوردستان رایده‌گه‌یه‌نێت “له‌ ئێستادا رێژه‌ی تووشبوون به‌ ڤایرۆسی کۆرۆنا به‌رزه‌ و بۆ‌ 3.8% هەڵکشاوە”.

وه‌زاره‌تی ته‌ندروستیی هەرێم به‌ هه‌ماهه‌نگی لەگەڵ رێكخراوی ته‌ندروستیی جیهانی ئەمڕۆ سێشەممە بە ئامادەبوونی دکتۆر سامان بەرزنجی، وەزیری تەندروستیی حکومەتی هەرێمی کوردستان و فرسەت سۆفی، پارێزگاری هەولێر و ئەدهەم ئیسماعیل، بەرپرسی رێکخراوی تەندروستیی جیهانی لە عێراق، هه‌ڵمه‌تێكی نوێی خۆپارێزی و به‌ره‌نگاربوونه‌وه‌ی ڤایرۆسی کۆرۆنا راگەیەنرا.

د. سامان به‌رزنجی وه‌زیری ته‌ندروستیی هه‌رێم له‌ كۆنگره‌یه‌كی رۆژنامه‌وانیدا رایگه‌یاند “له‌ هه‌ڵمه‌تەكەدا شێوازی نوێی رۆشنبیری و هۆشیاری بۆ به‌ره‌نگاربوونه‌وه‌ی ڤایرۆسی کۆرۆنا له‌ شاری هه‌ولێر ده‌ستپێده‌كات بۆ سه‌رتاسه‌ری هه‌رێمی كوردستان”.

وتیشی: “هه‌ڵمه‌ته‌كه‌ بریتییه‌ له‌ دابه‌شكردنی بڵاوكراوه‌كانی خۆپارێزی و هۆشیاری ته‌ندروستی و رێنمایی نوێ به‌سه‌ر هاووڵاتییان و شوێنه‌ گشتییه‌كاندا”.

له‌و هه‌ڵمه‌ته‌دا نزیكه‌ی 650 هه‌زار جۆری جیاواز له‌ پۆسته‌ر و بروشه‌ر له‌ رێگه‌ی 120 تیمی 3 كه‌سیی دابه‌شده‌كرێن، ئه‌وه‌شی خسته‌ڕوو، له‌ قۆناغێكی تریشدا له‌گەڵ رێكخراوی ته‌ندروستیی جیهانی ماسك به‌سه‌ر هاووڵاتییان و شوێنه‌ گشتییه‌كاندا دابه‌شده‌كه‌ین، له‌پێناو خۆپارێزی و كه‌مكردنه‌وه‌ ڤایرۆسی کۆرۆنا له‌ هێڵی پێشه‌وه‌ كه‌ بریتییه‌ له‌ خۆپارێزی و پابه‌ندبوون به‌ رێنماییه‌كان، چونكه‌ سه‌نگه‌ری پێشه‌وه‌ی خۆپارێزی شوێنه‌ گشتییه‌كان و ناو خێزانە، بۆیه‌ داوا ده‌كه‌ین هه‌موو لایه‌ك پابه‌ندی رێنماییه‌كانی خۆپارێزی بن به‌ تایبه‌ت به‌كارهێنانی ماسك و دووركه‌وتنه‌وه‌ له‌ قه‌ره‌باڵغی.

وتیشی: “ژماره‌یه‌كی زۆری تووشبوون به‌ ڤایرۆسی کۆرۆنا له‌ هه‌رێمی كوردستان هه‌یه، تا ئێستا زیاتر له‌ 314 هه‌زار پشكنین بۆ گومانلێكراوان و به‌ركه‌وتووان كراوه‌، ژماره‌ی تووشبووان تا دوێنێ گه‌یشته‌ 28750 حاڵه‌ت، ئه‌مڕۆش ئه‌و ژماره‌یه‌ زیاتر ده‌بێت”.

بەرزنجی رایگەیاند: “11.5% ئه‌و كه‌سانه‌ی پشكنینیان بۆ ده‌كرێت تووشی ڤایرۆسه‌كه‌ هاتوون و رێژه‌ی تووشبوون به‌ ڤایرۆسی کۆرۆنا بۆ‌ 3.8% زیادی كردووه”.

ئەوەشی ئاشکرا کرد “له‌و كه‌سانه‌ی تووشی کۆرۆنا بوون‌ 18049 حاڵه‌ت به‌ ته‌واوه‌تی چاكبوونه‌ته‌وه، 9629 حاڵه‌ت له‌ژێر چاره‌سه‌ركردندان كه‌ ژماره‌یه‌كیان له‌ نه‌خۆشخانه‌كانن و له‌ ژێر چاودێری چڕدان و چاره‌سه‌ری پێویست وه‌رده‌گرن و 1074 کەسیش بە پەتاکە گیانیانلەدەستداوە .