ژمارەیەک کرێکاری کورد لە شارێکی تورکیا هێرشیان دەکرێتە سەر و سووکایەتییان پێدەکرێت

SNN

پاشئەوەی ژمارەیەک کرێکاری کورد بەمەبەستی پەیداکردنی بژێویی ژیانی خۆیان روو لە ناوچە تورکەکان دەکەن، خاوەن باخێکی تورک سوکایەتی بەو کرێکارە کوردانە دەکات و دوار هێرشیان دەکاتەوە سەر.

بەگوێرەی هەواڵێکی میدیاکانی تورکیا، بارش دەمیری کە کرێکارە و خەڵکی شاری ماردینە، لەگەڵ ژمارەیەک لە کەسوکار و هاوڕێیانی، لەبەر نەبوونی کار لە زێدی خۆیان، کردوویانە بە خوو و ناچارن هەموو ساڵێک لەم وەرزەدا لە ماردینەوە ڕوو لە شاری ساکاریا دەکەن لە ڕۆژئاوای تورکیا بۆ کۆکردنەوەی بەرهەمی بندق.

بارش مارینی و هاوتاکانی ئەو وەک هەموو ساڵێک لەگەڵ خاوەن باخەکانی بندق لە ناوچە تورکەکان ڕێکدەکەون و خۆیان بۆ کار ئامادە دەکەن.

بارش دەڵێت: “سەرلە بەیانییەکی زوو بەرەو یەکێک لە باخەکان بەڕێ کەوتین، خاوەن باخ کە تورک بووە، لەبری بەیانی باش وتوێتی: (ڕەوە سەگەکە هاتن!)”

لە دوای ئەو قسەیە بارش و هاوڕێکانی لە باخەکە دووردەکەونەوە و شوێنەکە جێدێڵن، خاوەن باخ دووبارە بەدەم هاوار و هەڕەشەوە پێیان دەڵێت: “پێتانوایە ئێرە وڵاتی ئێوەیە؟ ئێرە وڵاتی ئێمەیە.”

دوای ئەوەی سووکایەتییەکی زۆریان پێدەکەن، 8 کەس کە 3 کەس لە نزیکانی خاوەن باخەکە کە دار و تێڵایان پێبووە، دەکەونە دارکاریکردنی کرێکارە کوردەکان و هەندێکیان بە سەختی بریندار دەکەن”