چۆنیەتی دەوامکردنی فەرمانبەرانی سنووری پارێزگای سلێمانی دیاریکرا

SNN

پارێزگای سلێمانی لە راگەیەندراوێکدا چۆنیەتی دەوامکردنی فەرمانبەرانی سنووری پارێزگاکەی دیاریکرد و رایگەیاند: “دەوامی فەرمی لە فەرمانگەکانی دەوڵەتدا هەفتانە لە رۆژی یەکشەممەوە تا رۆژی پێنجشەممە دەبێت.
ئەوەشی خستووەتەڕوو: دەسەڵاتی تەواو دراوە بە سەرۆکی یەکە کارگێڕییەکان، بەڕێوەبەرە گشتییەکان، بەڕێوەبەری هەر دامودەزگایەکی دەوڵەت کە پاڵپشت بە وەزارەتە پەیوەندیدارەکانی خۆیان پابەندی کاتژمێرەکانی دەوامکردنی رۆژانە دەبن.
هەروەها رێژەی دەوامکردنی فەرمانبەران بەپێی پێویستی فەرمانگەکان و بەپێی ژمارەی میلاکەکانیان بەشێوەی نۆرە دەبێت، بە مەرجێک نەبێتە هۆی وەستانی کاری فەرمانگەکان و دواکەوتنی مامەڵەی رۆژانەی هاووڵاتییان.
ئەوەش خراوەتەڕوو، دەوامکردن لە هەموو فەرمانگەکاندا بە ڕەچاوکردن و پابەندبوون بە رێکارە تەندروستی و خۆپارێزییەکانی پەتای کۆرۆنا دەبێت.