چالاكوانانى ههڵهبجه 72 كاتژمێر مۆڵهت دهدهنه حكومهتى ههرێم
پارێزگای هەڵەبجە | فۆتۆ: SNN
SNN – عەلی حەمە سەعید
لە بەرامبەر ئەو پەراوێزخستنەی كە لەلایەن حكومەتی هەرێم و چەند وەزارەتێكەوە بەرامبەر بە هەڵەبجە بەڕێوەدەچێت، ئەمڕۆ ژمارەیەك لە چالاكوانان و چین و توێژە جیاوازەكانی هەڵەبجە لە مۆنۆمێنتی هەڵەبجە گردبوونەوە.
لەدوای گردبوونەوەكە له كۆنگرەیەكی رۆژنامەوانیدا، باست عوسمان، بەناوی بەشداربووانی گردبوونەوەكەوە بەیاننامهیهكى خوێندەوە و وتى: “كێشەكانی هەڵەبجە گەورە و هەمەلایەنن، سەرباری كێشەی خراپی و نەبوونی خزمەتگوزارییە گشتییەكان، لە هەمان كاتیشدا دۆخی تەندروستی و كۆرۆنا لە خراپترین ئاستدایە، لەڕووی تەندروستییەوە شارەكە بێ خزمەتگوزارییە، بۆیە رێگە نادەین چیتر ئەم دۆخە بەمشێوەیە درێژە بكێشێت”.
وتیشى: “ئێمە مۆڵەتی 72 كاتژمێر دەدەینە لایەنه پەیوەندیدارەكان، تاوەكو فشار لە لیژنەی باڵای دروستكردنی پارێزگای هەڵەبجە بكەن، كه بەرنامەی خزمەتكردن و هێنانی پرۆژە بۆ شارەكە بخەنە پێشینەی كارەكانیان، ئەگەر بەرپرسانی شار نەیانتوانی ئەمە بكەن، دەستەڵات پشتگوێی خستن بگەڕێنەوە ئێرە و داوای هاوئاهەنگیمان لێبكەن، تافشاری هەمەلایەنەی چین و توێژەكانیان بۆ رێكبخەین، هاوشانی ئەوان شان بدەینە بەر بەرپرسیاریهتى ئەم قۆناغە، ئەگەر ئەمەش ناكەن ئەوا دەستلەكاربكێشنەوە، رێگابدەن تاوهكو دڵسۆزانی ئەمشارە بیر لەڕێگای دیكە بكەنەوە”.
هەر لە بەیاننامەكەی چین و توێژە جیاوازەكانی هەڵەبجە جەخت لەوەشكراوهتهوه، “بە مەبەستی جێبەجێكردنی داواكارییەكانمان و كۆتاییهێنان بە پەراوێز خستنی هەڵەبجە لە ئەمڕۆوە چاوەڕێی كاردانەوەی بەرپرسانین، هیوادارین بیر لە دەربازكردنی هەڵەبجە بكەنەوە، لەم بارودۆخەی كە تێی كەوتووە بۆ ئەوەی نەكهوینە دۆخێكەوە كە هیچ كەس ئاواتی پێنەخوازێت”.
