کوژرانی توێژەرێکی ڤایرۆسناسی چینی لەئەمریکا هەرای ناوەتەوە
"لەسەروبەندی ئەوەدا بووە بگاتە سەرەداوێک بۆ چارەسەری کۆرۆنا"
مامۆستا چینییە کوژراوەکە
SNN
پۆلیسی ئەمریکا کوژرانی مامۆستایەکی زانکۆی پیتەسبێرگ-ی لەویلایەتی پەنسلڤانیا راگەیاند کە خەریکبوو بگاتە ئەنجامێکی باش بۆ چارەسەری کۆرۆنا و پێدەچێت بە فیشەک کوژرابێت.
مامۆستاکە ناوی بینگ لیوە و تەمەنی 37 ساڵە رۆژی شەممەی رابردوو لەنێو ماڵەکەی خۆی بەکوژراویی دۆزراوەتەوە.
ئەوەی سەیرە ئەو کەسەی چۆتە ماڵەوە بۆ کوشتنی لیو پاش گەڕانەوەی بۆ ناو ئۆتۆمبێلەکەی، ئەویش خۆی کوشتووە و کۆتایی بەژیانی خۆی هێناوە.
ئەو کەسەی خۆی کوشتووە، ئەویش رەگەزنامەی چینی هەیە و تەمەنی 46 ساڵە و پۆلیس نەگەیشتۆتە هیچ سەرەداوێک لەبارەی بوونی پەیوەندییانەوە.
ئەو مامۆستایەی زانکۆ ئەمریکییەکە سەرەداوی باشی دۆزیبۆوە لەبارەی خانە سەرەتاییەکانی ڤایرۆسی سارس و کۆرۆنا و هاوڕێ و خوێندکارەکانی بەڵێنیانداوە بەردەوامیی بە توێژینەوەکەی بدەن.
