وەزارەتی تەندروستیی عێراق پەیامی دڵخۆشکەر دەدات، 80٪ی تووشبووان بێ مەترسین

SNN

سەرەڕای بەرزبوونەوەی ژمارەی تووشبووانی کۆرۆنا لە عێراق، وەزارەتی تەندروستیی عێراق دەڵێت: “80٪ ی تووشبووان مەترسییان لەسەر نییە و ڤایرۆسەکەیان بێ کێشەیە”.

ریاز عەبدولئەمیر بەڕێوەبەری گشتیی لە وەزارەتی تەندروستیی عێراق دەڵێت: “ئەو تووشبووانەی لای ئێمە تۆمار دەکرێن، 80٪یان تووشبوونی سادەن و ترسیان نییە”.

روونیشیکردەوە “پشکنین و پێوانەی ڤایرۆسەکەیان بۆ 10 هەزار کەس کردووە لە بازاڕ و شوێنە گشتییەکانی بەغدا و لەگەڵ ئەوەی تووشبوون زیاد بووە، بەڵام چاکبوونەوەش لەبەرامبەردا زیادیکردووە”.

وتیشی: “ئەوەی جێی دڵخۆشییە رۆژانە 4000 حاڵەتی چاکبوونەوە لە عێراق هەیە کە ئەوەش جێگەی دڵخۆشیی ئێمە و وەزارەتی تەندروستییە”.

دوێنێ وەزارەتی تەندروستیی عێراق رایگەیاند “68 حاڵەتی مردن هەبووە و 4894 تووشبووی نوێ و 3465 حاڵەتی چاکبوونەوەش هەبووە لە ڤایرۆسی کۆرۆنا”.