لە سنووری پشدەر، سوپای پاسداران هیچ جموجۆڵێکی سەربازی ئەنجام نەداوە

SNN- محەمەد مستەفا

هەرچەندە وڵاتی ئێران بە درێژای سنورەکانی لەگەڵ عێراق بە گشتی و سنووری هەرێمی کوردستان بەتایبەتی خەریکی رێکخستنی سەربازی و زیادکردنی ژمارەی سەربازە، بەڵام بەگوێرەی بەدواداچوونەکانی SNN بە درێژای سنووری قەزای پشدەر لەگەڵ ئێران سوپای پاسداران هیچ جوڵەیەکی سەربازی ئەنجام نەداوە.

سەرچاوەیەکی بەرپرس لەسەر سنووری نێوان باشوور و رۆژهەڵاتی کوردستان کە نەیویست ناوی ئاشکرا بکرێت بە SNN ی راگەیاند: بە دێژای سنووری هاوبەشی نێوان باشوور و رۆژهەڵاتی کوردستان لە بەشی قەزای پشدەر تا ئێستا هیچ جوڵەیەکی نایاسایی و سەربازی لە لایەن سوپای پاسدارانەوە بەدی نەکراوە و دۆخی سەر سنووریش لەوپەڕی ئارامیدایه.

ئەو سەرچاوەی وتیشی :”لەسنووری قەزای پشدەر سوپای پاسداران هیچ یەکەیەی چاودێری زیاد نەکردووە دەنگۆی بوونی هیچ ئۆپەڕاسیۆنێکیش لە ئارادا نییە و تەنانەت چەند ساڵێکیشە سوپای پاسداران هیچ تۆپبارانێکی سنوری قەزای پشدەریشی نەکردووە”.

” تەقە لە شوانکارە کوردەکان دەکرێت و 3 شوان بە سەختی بریندار کراون “

هەر سەبارەت بە دۆخی ئەمنی سەر سنوور سەرچاوەیەکی ئەمنی لە راپەڕین بە SNN ی راگەیاند: لە ئێستادا جوڵەی سەربازی لەسەر سنووری نێوان باشوور و رۆژهەڵاتی کوردستان لە سنووری قەزای پشدەر بوونی نیە، بەڵام ناوبەناو سوپای پاسداران تەقە لە شوانکار و مەڕدارەکانی قەزای پشدەر دەکەن و لە ماوەی مانگی رابردوو 3 گەنجی شوانکارەی خەڵکی پشدەر بە گولەی سوپای پاسداران بە سەختی بریندار کراون .