12 ژن داوای پۆستی سەرۆكی دەستەی مافی مرۆڤ دەكەن

SNN- مەودا مستەفا
بەرپرسی ڕاگەیاندنی پەرلەمانی كوردستان رایدەگەیەنێت “دوای ئەوەی لەسەرەتایی مانگی ئەیلول پەرلەمانی كوردستان دەرگای پێشكەشكردنی سیڤی بۆ سەرۆكی دەستەی مافی مرۆڤ كردەوە، ئەمڕۆ دوا وادە بوو بۆ پێشكەشكردنەكە، لە داهاتوو پەرلەمانی كوردستان دەنگ لەسەر یەكێك لە سیڤییەكان دەدات”.

سامان ئەحمەد بەرپرسی ڕاگەیاندنی پەرلەمان لە كۆنگرەیەكی ڕۆژنامەوانیدا ڕایگەیاند “بۆ وەرگرتنی پۆستی سەرۆكی دەستەی سەربەخۆی مافی مرۆڤ، ئەمڕۆ دوا ڕۆژە و 31 كەس تا ئێستا سیڤی ناردووە، دەستەی سەرۆكایەتی پەرلەمانی كوردستان لەگەڵ ئەنجوومەنی وەزیران لەسەر ئەو بابەتە گفتوگۆ دەكات”.

وتیشی: “لەو 31 هاووڵاتییەی داوای پێشكەش كردووە 12 یان ژنن و 19 یان پیاون و لە سەرجەم چین و توێژەكان و پێكهاتەكانی هەرێمی كوردستانن”.

دەستەی سەربەخۆی مافی مرۆڤ سەربە پەرلەمانی كوردستانە، لە ماوەی ڕابردوو بانگەشە بۆ پڕكردنەوەی ئەو پۆستە لەلایەن پەرلەمانی كوردستان ڕاگەیەنرا.

سامان ئەحمەد بەرپرسی ڕاگەیاندنی پەرلەمان باسی لەوەشكرد، دوای جیاكردنەوە سیڤی كەسەكان، دەستەی سەرۆكایەتی پەرلەمانی كوردستان لەگەڵ ئەنجوومەنی وەزیران لەسەر ئەو بابەتە گفتوگۆ دەكات و دواتر بڕیار دەدرێت.