رێککەوتنی ئاشتی نێوان ئیمارات – بەحرەین و ئیسرائیل واژوو کرا

SNN-

ئێوارەی ئەمڕۆ لە کۆشکی سپی بە ئامادەبوونی دۆناڵد ترەمپ سەرۆکی ئەمریکا هەریەک لە ئیمارات – بەحرەین لەگەڵ ئیسرائیل رێککەوتننامەی ئاشتیی نێوانیان واژوو کرا.

سەرۆکی ئەمریکا لەبارەی رێککەوتنەکەوە وتی: “ئەمڕۆ رۆژێکی مێژووییە و چەندین وڵاتی دیکەی عەرەبیش دەیانەوێ هەمان هەنگاو بنێن”.

لای خۆیەوە بنیامین ناتانیاهۆ سەرۆکوەزیرانی ئیسرائیل وتی: “ئەم رێککەوتنە دەتوانێت بۆ هەمیشە ئاستێک لەنێوان ئیسرائیل و وڵاتانی عەرەبیدا دابنێت لەبارەی ململانێ و ناکۆکییەکانی ناوچەکەوە”.

هاوکات عەبدوڵا بن زاید وەزیری دەرەوەی ئیمارات رایگەیاند “وڵاتەکەی بە کردەوە ئاشتی دەوێت و بە هەوڵی بەڕێز ترەمپ ئەم پرۆسەیە چووە سەر و واژوو کرا”.

رۆژی 11ی ئەم مانگە دۆناڵد ترەمپ سەرۆکی ئەمریکا لە تویتێکدا رایگەیاند: “ئیسرائیل و بەحرەینی هاوڕێمان رێککەوتنێکی ئاشتی لە نێوانیاندا واژوو دەکەن، ئەوەش دەبێتە دووەم وڵاتی عەرەبی کە لە 30 رۆژدا لەگەڵ ئیسرائیل رێککەوتنی ئاشتی واژوو بکات”.

رۆژی 13ی مانگی ئابی رابردووش هەریەک لە ئیسرائیل و دەوڵەتی ئیمارات رێککەوتننامەیەکی ئاشتییان واژوو کرد بۆ ئاساییکردنەوەی پەیوەندییەکانی نێوانیان.