فراکسیۆنی یەکێتی داوای ئاشکراکردنی بکوژانی خێزانە کوردەکە دەکات

SNN

فراکسیۆنی یەکێتیی نیشتمانیی کوردستان لە پەرلەمانی عێراق ئەمڕۆ چوارشەممە داوای لە سەرۆکوەزیرانی عێراق کرد هەرچی زووە بکەرانی تاوانی کوشتنی خێزانە کوردەکەی بەغدا بدۆزرێنەوە و بدرێن بە دادگا.

شەوی رابردوو پزیشکی دەرمانسازی کورد شیلان دارا رەئوف، لە شاری بەغدا لەماڵەکەی خۆی لەگەڵ دایک و باوکی بە کوژراویی دۆزرانەوە.

شیلان دارا دەرچووی کۆلێژی دەرمانسازی زانکۆی بەغدایە لەساڵی 2016ـەو دانیشتووی ئەو شارەشە.

فراکسیۆنی یەکێتی لە بەغدا دەڵێن: “ئەوانەی ئەو کارەیان کردووە شەمشەمە کوێرەی تارمایی-ن و دەبێت دادگا سزای توندیان بدات و ئیدانەی کردەی لەمشێوەیە دەکەین”.

فراکسیۆنەکە داواشدەکات رێگە بگیرێت لە دووبارەبوونەوەی تاوانی لەمشێوەیە و دۆسیەی پاراستنی ژیانی هاووڵاتی سڤیل بدرێتە دەستێکی ئەمین.

بەرەبەیانی دوێنێ (سێشەممە، 15-9-2020) لە بەغدا، دارا رەئوف، عالیە نەجمی خێزانی و شیلانی کچیان لەنێو ماڵەکەی خۆیاندا لە گەڕەکێکی بەغدا کوژران.