لە ڕاپەڕین پشکنینی کۆڕۆنا وەستاوە و ژمارەی قوربانیانی ڤایرۆسەکەش نزیک دەبێتەوە لە 100 کەس
کۆرۆنا پشکنین
SNN- محەمەد مستەفا
لە ماوەی 5 مانگی رابردوو لە سنووری ئیدارەی راپەڕین 99 کەس بەهۆی ڤایرۆسی کۆڕۆناوە گیانیان لە دەستداوە و ماوەی 3 رۆژیشە بەهۆی نەمانی کیتی پشکنینی ڤایرۆسەکە لە ڕاپەڕین پشکنین ئەنجام نەدراوە.
تەها محەمەد بەرپرسی راگەیاندنی تەندروستیی ڕاپەڕین بە SNNی راگەیاند: ژمارەی ئەو کەسانەی بەهۆی ڤایرۆسی کۆڕۆنا گیان لە دەستدەدەن رووی لە بەرزبوونەوە کردووە و تا ئەمڕۆ 99 کەس گیانیان لە دەستداوە و هاووڵاتییانیش وەک پێویست پابەند نین بە جێبەجێکردنی رێنماییە خۆپارێزییەکان .
وتیشی “ماوەی سێ رۆژە کیتی پشکنینی کۆڕۆنا لە ڕاپەڕین نەماوە بەو هۆیەوە هیچ پشکنینێک ئەنجام نەدراوە و لە ئێستادا لە هەوڵدان بۆ دابینکردنی کیتی پشکنینی کۆڕۆنا”
باسی لەوەشکرد :هاوکاریە دارایەکانی حکومەتی هەرێم بۆ رووبەڕووبوونەی ڤایرۆسی کۆڕۆنا لە ئاست زۆری دانیشتووانی سنوورەکە نییە و لە مانگی 3ی رابردووە 958 ملیۆن دینار خەرجکراوە.
تەها محەمەد راشیگەیاند: ئەو بڕە پارەیە بۆ دروستکردنی دوو سەنتەری کۆڕۆنا و کڕینی ئامێری تاقیگەی و هاندانی کارمەندان و پزیشکان بەکارهێنراوە و دەڤەری راپەڕین پێویستی بە هاوکاری دارایی زۆر زیاتر هەیە بگەهۆی زۆری دانیشتووان و فراوانی سنووری جوگرافی.
