بومەلەرزەیەکی بەهێز تارانی هەژاند

سەرلەبەیانی ئەمڕۆ هەینی، بومەلەرزەیەک بە گوڕی 5.1 پلەی رێختەر لە تارانی پایتەختی ئێران روویدا و ژمارەیەک قوربانی لێکەوتەوە.

بە گوێرەی میدیاکانی ئێران، لەکاتی روودانی بومەلەرزەکەدا هاووڵاتیان تووشی ترس و دڵەڕاوکێ بوون و لەکاتی هەڵاتنی هاووڵاتیان لە شوقەکانیانەوە بۆ ناو کۆڵانەکان، دوو کەس گیانیان لەدەستداوە و 13 کەسی دیکە بریندار بوون.

ئەوەش بڵاوکراوەتەوە، بوومەلەرزەکە لە قووڵایی 7 کیلۆمەتری زەوین و لە سنووری پارێزگای تاران و مازەندەران و لە نزیکی دەماوەند ڕوویداوە.

ئاماژەش بەوەکراوە، دوابەدوای ئەو بومەلەرزەیە 16 بومەلەرزەی لاواز روویانداوە کە بەهێزترینیان 3.9 پلەی رێختەر بووە.

ئێران بەهۆی هەڵکەوتەی جوگرافییەوە بومەلەرزە تیایدا روودەدات، کوشندەترین بومەلەرزەش کە تا ئێستا لەو وڵاتە روویدابێت لە ساڵی 1990دابوو بە گوڕی 7.4 رێختەر کە بەهۆیەوە نزیکەی 40 هەزار کەس گیانیان لەدەستدا و 300 هەزار کەسی دیکەش برینداربوون.