لەهەڵبژاردنی داهاتوو کورد کورسییەکانی کەم دەکات

SNN

راوێژکارێکی پێشووی سەرۆککۆماری عێراق دەڵێت: “بەپێی ئەو سیستمەی دانراوە لەگەڵ گۆڕانی بارودۆخەکە کورد لەهەڵبژاردنی داهاتووی عیراق کورسییەکانی کەم دەکات”. 

سالار مەحمود دەشڵێت: “لە بنەمادا لەبەرئەوەی سەرژمێری دانیشتوان نەکراوە دانانی کورسی پارێزگاکانی هەرێم دادپەروەر نییە. پشتبەستن بە فۆرمی خۆراک وەک جێگرەوەی سەرژمێری لەسەرەتاوە هەڵە بووە”.

بەوتەی ناوبراو، خاڵی نوێی یاسای هەڵبژاردنی پەرلەمانی عیراق فرە بازنەیی و نوێنەرایەتی تاکەکەسییە و لەیاسا نوێکەدا بەناڕاستەوخۆ ئاماژە بە تۆماری ئەلیکترۆنی کراوە، بەڵام ئاکام فۆرمی خۆراک دەبێتە بنەما نەک بایۆمەتری، کە ئەمەش بواری گەورەتر بۆ ناڕوونی هێشتۆتەوە، هێشتا 100٪ دەنگدەرانی عیراق کارتی بایۆمەترییان نییە.

بەوتەی سالار مەحمود کەمبوونی کورسییەکانی کورد بە شێوەیەکی سەرەکی پەیوەندی بە پاشەکشەی کوردەوە هەیە لە ناوچە دابڕاوەکان. یاسای هەڵبژاردنی ئەنجومەنی نوێنەران لە 29/12/2019  دەنگی لەسەر دراوە، لەپەنجا مادە پێکهاتوە، هێشتا نا روون و گرفتدارە، بۆیە پێویستی بە پاشکۆی روونکاریی و تەواوکارییە.