ئەوقافی گەرمیان  لەبارەی کردنەوەی مزگەوتەکانەوە روونکردنەوە دەدات

بەڕێوەبەرایەتیی گشتیی ئەوقافی گەرمیان رایگەیاند: دەنگۆی کردنەوەی مزگەوتەکانی سنووری گەرمیان دوورە لە راستییەوە.

سیروان حەسەن ،SNN

سەباح حەمەساڵح بەڕێوەبەری گشتیی ئەوقافی گەرمیان بە SNNی راگەیاند: “لە تۆڕە کۆمەڵایەتییەکاندا ھەواڵێک بڵاو کراوەتەوە کە ئەمڕۆ ھەینی دەرگای مزگەوتەکان دەکرێنەوە، ئەم ھەواڵە دوورە لە ڕاستییەوە، کردنەوەی دەرگای مزگەوتەکان لە دەسەڵاتی ئەنجوومەنی وەزیراندایە و ڕۆژی 11ی ئایار بڕیاری لەبارەوە دەدرێت”.

بەڕێوەبەری گشتیی ئەوقافی گەرمیان داوای لە مامۆستایانی ئایینی کرد پابەندی بڕیارەکانبن و راشیگەیاند: “ھەر کەسێک سەرپێچی بکات، رووبەڕووی سزای یاسایی دەبێتەوە”.

ئەمە لەکاتێکدایە دوێنێ وەزارەتی ئەوقاف و کاروباری ئاینی حکومەتی هەرێمی کوردستان رایگەیاند، رۆژی دووشەممەی داهاتوو مزگەوتەکان دەکرێنەوە.