“هەركات ڤاكسینی دژە كۆرۆنا بگاتە عێراق هەرێمیش پشكی دەبێت”
Sputnik V دەرمانە رووسییەکە
SNN- بریار محەمەد
وتەبێژی وەزارەتی تەندروستیی هەرێمی كوردستان رایدەگەیەنێت “هەر كاتێك لە هەر وڵاتێك ڤاكسینی دژە كۆرۆنا رەوانەی عێراق بكرێت، هەرێمی كوردستانیش پشكی لەو ڤاكسینەدا هەیە، بەڵام تاوەكو ئێستا هیچ ڤاكسینێك نەگیشتووەتە عێراق و هەرێمی كوردستان”.
دكتۆر ئاسۆ حەوێزی وتەبێژی وەزارەتی تەندروستیی حكومەتی هەرێمی كوردستان بە SNNی راگەیاند “رێكکەوتن لەنیۆان هەردوو وەزارەتی تەندوستی هەرێم و بەغدادا هەیە بۆ ئەوەی هەر كاتێك ڤاكسینی دژە ڤایرۆسی كۆرۆنا بێتە عێراق بەشی هەرێمی كوردستانی لێبەدرێت، بەڵام تاوەكو ئێستا هیچ جۆرە ڤاكسینێک نەهاتووەتە عێراق و هەرێمی كوردستان” .
وتیشی: “رێكکەوتن لە نێوان حكومەتی عێراق و رووسیادا كراوە بۆ ئەو ڤاكسینە رووسییە و هەركاتێكیش ئەو ڤاكسینە گیشتە عێراق، ئەوا بەپێی رێكکەوتن پشكی هەرێم راستەوخۆ دەنێردرێتە كوردستان، بەڵام دیار نییە بڕەكەی چەندە و كەی دێت و بەچ شێوەیەك دەبێت”.
شایانی باسە رۆژی 11ی ئابی رابردوو وەزارەتی تەندروستی رووسیا یەكەم ڤاكسینی دژی ڤایرۆسی كۆرۆنا تۆماركرد بە ناوی “Sputnik V” هەروەها ڤاكسینەكە لەلایەن پسپۆڕانی سەنتەری “گامالی” بە پشتیوانی سندوقی وەبەرهێنانی راستەوخۆی رووسی كاری لەسەر كرا و بەرهەمهێنرا.
