11 ژن و 4 پیاوی ئەفغانی لە سەرەی وەرگرتنی ڤیزا گیانیان لەدەستدا

SNN

سایتی (BBC) بڵاوی کردووەتەوە ئەمڕۆ چوارشەممە 21ی تشرینی یەکەم لەناو یاریگای وەرزشیی شاری جەلال ئاباد لە هەرێمی نەنگرها لە ڕۆژهەڵاتی ئەفغانستان، هەزاران هاووڵاتیی ئەو وڵاتە بەمەبەستی وەرگرتنی ڤیزای پاکستان کۆ بوونەتەوە و بەهۆی نەبوونی ڕێوشوێنی دروست، قەرەباڵغییەکی زۆر دروست بووە و بەو بۆنەوە 11 ژن کەوتوونەتە ژێر دەست و قاچ و گیانیان لەدەست داوە.

هاوکات بەڕێوەبەرانی تەندروستی و بەرپرسانی کۆنسوڵخانەی پاکستان لە جەلال ئاباد ئەم هەواڵەیان پشتڕاست کردووەتەوە و بریندارەکان کە 12 کەس بوون، 11 کەسیان ژن و 4 کەسیشیان پیاو بوون.

پێدانی ڤیزای پاکستان بە هاووڵاتیانی ئەفغانی لە ڕێکەوتی 16ی ئازاری 2020، و پاش سەرهەڵدانی ڤایرۆسی کۆرۆنا ڕاگیرابوو، بەڵام ماوەی 10 ڕۆژ دەبێت دیسان دەستی پێ کردووەتەوە.

زۆرێک لە هاووڵاتیانی ئەفغانی، بەتایبەت لە هەرێمەکانی ڕۆژهەڵاتی ئەو وڵاتە بۆ دەرمان و چارەسەریی پزیشکی، یان بۆ کار و کاسبی سەفەری پاکستان دەکەن.

دانی ڤیزای پاکستان جیاواز لە باڵوێزخانەی ئەو وڵاتە لە کابول، لە هەرێمەکانی “نەنگرها، قەندەها، هەرات و مەزار شەریف”یش دابەش دەکرێت.