تورکیا.. بەهۆی قەیرانی داراییەوە 10 هەزار کۆمپانیا لەکار کەوتوون
SNN
کۆمپانیا مایەپووچبووەکانی نۆ مانگی یەکەمی ئەمساڵ لە تورکیا ژمارەیەکی پێوانەییان تۆمار کرد لەڕووی زۆریی داخستنیانەوە، بە جۆرێک لەو ماوەیەدا 10 هەزار کۆمپانیا دەرگاکانیان داخستووە.
ماوەی دوو ساڵە قەیرانی دارایی تەنگی بە ئابووری ئەو وڵاتە هەڵچنیوە، کۆمپانیا تورکەکان کۆرۆنا زیاتر ماندووی کردوون و وایان لێهاتووە هیچ دەرچەیەکیان نەبێت بۆ خۆ رزگار کردن.
یەکێتیی ژوورە بازرگانییەکانی تورکیا رایگەیاندووە “10 هەزار و 453 کۆمپانیا لە نۆ مانگی یەکەمی ئەمساڵدا داخراون و بەبەراورد بە ساڵی پار وەک ئەم وەختە 11٪ زیادیکردووە کە 9385 کۆمپانیا بووە”.
زۆرینەی ئەو کۆمپانیایانەی مایەپووچبوون، کۆمپانیاکانی بواری وزەی کارەبا و بیناسازی و ئەندازیاری و کۆمپانیای هاوبەشن لە خزمەتگوزاریی ئەندازیاریدا.
