دوای 2 مانگ پارە بۆ نۆژەنكردنەوەی بیناى سەرۆكایەتی شارەوانی هەڵەبجە تەرخانكرا

SNN-عەلی حەمە سەعید
سەرۆكی شارەوانی هەڵەبجە ئاشكرایكرد: دوای هەوڵێكی زۆر و سەردانیكردنی وەزارەتەكانی شارەوانی و دارایی، دواجار حكومەتی هەرێم بڕە پارەیەكی بۆ نۆژەنكردنەوەی بینای سەرۆكایەتی شارەوانی هەڵەبجە تەرخانكرد.

كوێستان ئەكرەم، سەرۆكی شارەوانی هەڵەبجە بە SNNی راگەیاند: “دوای هەوڵێكی زۆرمان و چەند جارێك سەردانیكردنی هەولێر و كۆبوونەوەمان لەگەڵ وەزیرانی شارەوانی و دارایی توانیمان رەزامەندی خەرجكردنی بڕێك پارە بۆ نۆژەنكردنەوەی بینای سەرۆكایەتی شارەوانی هەڵەبجە بەدەستبهێنین، هاوكات لە كەمكردنەوەیەكی نهێنیشدا نۆژەنكردنەوەكە دەدرێتە كۆمپانیایەكی تایبەتەمەند”.

وتیشى: “بەهۆی ئەوەی بڕی ئەو پارەیەی بۆ نۆژەنكردنەوەكە تەرخانكراوە بەشێوەی كەمكردنەوەی نهێنی دەدرێتە كۆمپانیایەك، بۆیە ناتوانین بڕی پارەكە ئاشكرا بكەین، بەڵام پارەكە ئامادەیە و لە گەنجینەی دووی سلێمانی پارەكە دانراوە، بەو بڕە پارەیەش ئەو كەموكوڕییانەش پڕ دەكەنەوە كە پێش سووتاندنی باڵەخانەكە هەمان بوو”.

سەرۆكی شارەوانی هەڵەبجە ئەوەشی خستەڕوو: “لەگەڵ دەستپێکردنى نۆژەنكردنەوەی بینای سەرۆكایەتی شارەوانی ناچارین كە دەوامی شارەوانی رابگرین تاوه‌كو ئەو كاتەی نۆژەنكردنەوەكە كۆتایی دێت، بۆیە چاوەڕێدەكەین لە چەند رۆژی داهاتوودا كۆمپانیایەك دەستبەكار ببێت و دەستبەكاری نۆژەنكردنەوەی بیناكە بكات”.

شەوی 23 ئابى 2020، بەهۆی خۆپیشاندنی ژمارەیەك لە هاووڵاتییانی هەڵەبجە و هێرشكردنیان بۆ سەر چەند فەرمانگەیەكی حكومی، بینای سەرۆكایەتی شارەوانی و بنكەی هاتووچۆی هەڵەبجە سووتێندران، هاوكات بەهۆی ئەو سووتاندنەوە زیاتر لە سێ هەزار بەڵگەنامەی هاووڵاتییانی هەڵەبجە لە بەشی گەنجینەكانی شارەوانی هەڵەبجە سووتێنداران.