پەرلەمانی کوردستان کۆدەبێتەوە

SNN

ئەمڕۆ پەڕلەمانی كوردستان كۆدەبێتەوە و گفتوگۆ لەبارەی سێ تەوەر دەکرێت کە لە یەکێک لە تەوەرەكاندا گفتوگۆ لەبارەی پرساندنی سەرۆك و جێگری سەرۆكی حکومەت و وەزیری دارایی هەرێم دەکرێت.

ڕێواز فایەق سەرۆكی پەڕلەمانی كوردستان لە نووسراوێكدا بانگهێشتی گشت ئەندامانی پەڕلەمانی دەكات بۆ ئامادەبوون لەدانیشتنی ژمارە 9ی ئاسایی خولی پایزەی ساڵی دووەم لەخولی هەڵبژاردنی پێنجەمی پەڕلەمانی كوردستان، لەكاتژمێر 2:00ی پاشنیوەڕۆی ئەمڕۆ.

لە کارنامەی کۆبوونەوەکەدا سێ تەوەر باسکراوە، لە تەوەری یەكەمدا خوێندنەوەی یەكەم بۆ هەریەكە لە پێشنیازە یاساكانی پاراستنی تۆڕ و بنچینەكانی ئاو و ئاوەڕۆ لە هەرێمی كوردستان ـ عیراق)، پێشنیازی یاسای (بەڕێوەبردن و پاراستنی ئاو لە هەرێمی كوردستان ـ عیراق)، لە تەوەری دووەمیشدا دانانی ئەندامی پەڕلەمان (عومەر عەبدوڵڵا فەتاح) لە لیژنەی دارایی و كاروباری ئابووری.

لە تەوەری سێیەمیشدا گفتوگۆی پرساندن و وەڵامەكانی (سەرۆكی ئەنجومەنی وەزیران) و جێگری سەرۆكی ئەنجومەنی وەزیران و وەزیری دارایی و ئابوری بەپێی حوكمی ماددەكانی (70، 71، 73) لە پەیڕەوی ناوخۆی پەڕلەمانی كوردستان.