“قوباد تاڵەبانی رایسپاردوین پێداویستیيەكانی بودجەی 2021ى هەرێم ئامادە بكەین”

SNN-عەلی حەمە سەعید
سەرۆكی دیوانی ئەنجوومەنی وەزیران رایده‌گه‌یه‌نێت: بابەتی گفتوگۆكانمان لەگەڵ حكومەتی عێراقی جیاكردووەتەوە مەلەفی كەركوك و ناوچە جێناكۆكەكان بەجیا لەگەڵ حكومەتی عێراقی گفتوگۆ دەكەین، ده‌شڵێت: “جێگری سەرۆكی حكومەتی هەرێم رایسپاردوین كە پێداویستیيەكانی هەرێم بۆ بودجەی 2021 لەگەڵ حكومەتی عێراق ئامادە بكەین”.

ئومێد سەباح، سەرۆكی دیوانی ئەنجوومەنی وەزیران بە SNNی راگەیاند: “لەلایەن ئەنجوومەنی وەزیرانی هەرێمەوە فەرمانمان پێكراوە كە سەردانی بەغدا بكەینەوە بۆ چارەسەركردنی هەندێك كێشە و گرفت كە لەنێوان ئێمە و عێراق بەچارەسەر نەكراوی ماونەتەوە، بۆ ئەو مەبەستەش ئێمە بابەتی گفتوگۆكانمان لەگەڵ حكومەتی عێراقی جیاكردووەتەوە، مەلەفی بودجە و مووچە و پشكی هەرێم بە جیا باسدەكرێت، هاوكات مەلەفی كەركوك و ناوچه‌ جێناكۆكەكانیش بە جیا باس دەكەین”.

وتیشى: “قوباد تاڵەبانی، جێگری سەرۆكی حكومەتی هەرێم رایسپاردووین كە پێداویستییەكانی هەرێم لە بودجەی گشتی عێراق بۆ ساڵی 2021 ئامادە بكەین، چونكە تا كۆتایی مانگی داهاتوو بودجەی ساڵی 2021 ئامادە دەكرێت، هاوكات ئێمە بۆچوون و پێداویستی خۆمان لەو پرۆژەیاسایە ئامادە دەكەین و لە چەند رۆژی داهاتوودا سەردانی بەغدا دەكەینەوە”.

سەرۆكی دیوانی ئەنجوومەنی وەزیران ئەوەشی خستەڕوو: “تا ئێستا هیچ وادەیەك دیاری نەكراوە بۆ سەردانیكردنەوەی شاندی حكومەتی هەرێم بۆ واژووكردنی رێككەوتنی نێوان هەولێر و بەغدا، بۆیە چاوەڕێدەكەین دۆخی دارایی عێراق و پرۆژەیاسای قەرز بەرەو چارەسەر كردن بڕوات پاشان شاندی باڵای سەرۆكی حكومەتیش سەردانی بەغدا دەكەنەوە”.