عێراق و میسر 15 یاداشتی لێکتێگەیشتنیان واژووکرد
SNN
بە ئامادەبوونی سەرۆکوەزیرانی عێراق و هاوتا میسریەکەی، عێراق و میسر 15 یاداشتی لێتێگەیشتن و بەرنامەی ھەماھەنگیان لە بوارە جیاجیاکاندا واژوو کرد.
بە گوێرەی ئەو راگەیەنراوەی لە نووسینگەی راگەیاندنی سەرۆکوەزیرانی عێراق بڵاوکراوەتەوە، یاداشتنی لێتێگەیشتن لە بوارەکانی گواستنەوە، سامانی ئاو، تەندروستیی، ژینگە، داد، وەبەرھێنان، ئاوەدانکردنەوە، نیشتەجێکردن، پیشەسازیی، بازرگانی و دارایی لە نێوان بەغدا و قاھیرە واژوو کراون.
نووسینگەی راگەیاندنی سەرۆکوەزیرانی عێراق لە راگەیەندراوێکدا بڵاوی کردەوە کە مستەفا کازمی و مستەفا مەدبولی سەرپەرشتی کۆبوونەوەی شاندی ھەردوو حکوومەتی عێراق و میسر-یان تایبەت بە کارەکانی لیژنەی باڵای ھاوبەشی ھەردوو وڵات کردووە.
بەپێی راگەیەندراوەکە لە سەرەتای کۆبوونەوەکەدا، مستەفا کازمی ئاماژەی بە پەیوەندییەکانی نێوان عێراق و میسری داوە و رایگەیاندووە کە عێراق خواستی ھەیە پەرەی زیاتر بە پەیوەندیی ستراتجیی لەگەڵ میسر بدات و وتی: “سوپاسی میسر دەکەین کە لە شەڕی دژبە داعش پاڵپشتی عێراقی کردووە”.
مستەفا کازمی جەختیکردووەتە لەسەر ئەوەی کە گرنگە عێراق سوود لە ئەزموونی میسر لە کەرتی نیشتەجێبوون و ئاوەدانکردنەوە ببینێت و داواشی لە کۆمپانیاکانی میسر کردووە کە بەشداری لە دووبارە ئاوەدانکردنەوەی ناوچە کۆنترۆڵکراوەکانی عێراق بکەن.
بەیانی ئەمڕۆ شەممە، سەرۆکوەزیرانی میسر، مستەفا مەدبولی بە سەرۆکایەتی شاندێکی باڵای وڵاتەکەی بە سەردانێکی فەرمی گەیشتە بەغدا و لەلایەن سەرۆکوەزیرانی عێراق، مستەفا کازمی پێشوازیی لێکرا و دواتر کازمی و مەدبولی سەرپەرشتی کۆبوونەوەی شاندی ھەردوو حکوومەتی عێراق و میسر-یان کرد.
