خۆپیشاندان لەشاری بەغدا دەستیپێکردەوە و داوای کردار لەکازمی دەکرێت

 SNN-

ئەمڕۆ یەکشەممە لەشاری بەغدا و زیقار و زۆربەی ناوچەکانی ناوەڕاست و باشووری عێراق خۆپیشاندەران هاتنەوە سەر شەقامەکان و داوای بەڵێن و کردار لە سەرۆکوەزیرانی نوێ دەکەن.

بۆ یەکەمجاریش دوای چەندین مانگ، خۆپیشاندەران بەربەستی یەکەمیان لەسەر پردی جمهوریی لەدیوی گۆڕەپانی تەحریرەوە بڕیوە و لەهێزە ئەمنییەکان نزیکبوونەتەوە.

خۆپیشاندەران لەبەغدا داوا لە سەرۆکوەزیرانی نوێ مستەفا کازمی دەکەن خۆی بسەلمێنێت و بکوژی خۆپیشاندەران بداتە دادگا و بەڵێنەکانی شەقام جێبەجێبکات.

هاوکات لەشارەکانی زیقار و موسەننا و واست خۆپیشاندان پەرەی سەندووە و هاوڵاتیان داوای کردار لە کازمی دەکەن و هێزە ئەمنییەکانیش بە غازی فرمێسکڕێژ وەڵامیان دەدەنەوە.

دوێنێ مستەفا کازمی سەرۆکوەزیرانی عێراق بڕیاریدا ئەوانەی بەهۆی خۆپیشاندانەکانەوە دەستگیر کرابوون ئازاد بکرێن و بەڵێنی چاکسازی تەواوی داوە.