لە هەولێر ماسك لەلایەن منداڵانەوە بەشێوەی ناتەندروست دەفرۆشرێت
SNN- بریار محەمەد
بەپێی بەدواداچوونێكی SNN لەنێو بازاڕی شاری هەولێر ماسك لەلایەن ژمارەیەك لە منداڵان بەشێوەی ناتەندروست دەفرۆشرێت و بەرێوبەری گشتی دیوانیش لە وەزارەتی تەندروستی دەڵێت پێویستە ماسك تەنها لە دەرمانخانە و شوێنە رێگا پێدراوەكانی تەندروستی بكڕدرێت ئەوەی ئێستا دەبیندرێت رێگایەكی ترە بۆ بڵاو بوونەوەی ڤایرۆسی كۆرۆنا .
محەمەد عەبدوڵا منداڵێكی تەمەن 13 ساڵانە و خەڵكی باشور و ناوەراستی عێراقە، بەهۆی خراپی دۆخی داراییەوە ماوەی چوار ساڵە لە هەولێر كار دەكات، ئەو دەڵێت پێشتر بنێشت و پێداویستی ترم دەفرۆشت، بەڵام ئێستا ماسك دەفرۆشم و بۆ هەر كارتۆنێك بڕی 3 هەزار دینار دەدەم كە هەر كارتۆنێك 50 دانەی تێدایە و هەر دانەیەكیش بە 250 دینار دەفرۆشمەوە بەدوو رۆژ جارێك كارتۆنێك دەفرۆشمەوە، بە تەنها منیش لێرە كار ناكەم چەندین منداڵی ترم لەگەڵە کە ئەو كارە دەكەن .
لای خۆشیەوە خالس قادر بەرێوبەری گشتی دیوان لە وەزارەتی تەندروستی حكومەتی هەرێمی كوردستان بە SNNی راگەیاند : لە راستیدا ئەو شێوازی فرۆشتنەی منداڵان لە نێو بازار ناتەندروستە و لە هەمان كاتیشدا رێگا خۆشكەرە بۆ بڵاوبوونەوەی جارێكی تری ئەو ڤایرۆسە و بۆیە كرڕنی ماسك تەنها دەبێت لە دەرمانخانە و شوێنە رێگا پێدراوەکانی تەندروستی بێت نەك لە دەست منداڵان، چونكە ئەو ماسكانە نابێت دەستی بەر بكەوێت چ جای کە ئەو منداڵانە بەردەوام لەبەردەستیانە.
