حکومەتی هەرێم وردەکاری دانوستانەکانی خۆی لەگەڵ بەغدا ناردە پەرلەمان

SNNـ بڕیار محەمەد 

راپۆرتی لیژنه‌ی دانوستانكار گه‌یشته‌ په‌رله‌مانی كوردستان و دواتر ئاراسته‌ی لیژنه‌ په‌یوه‌ندیداره‌كان و ‌سه‌رجه‌م ئه‌ندامانی په‌رله‌مان ده‌كرێت، چاوەڕێدەکرێت بۆ رای گشتیش بخرێته‌ڕوو.

سامان ئەحمەد بەکر بەرپرسی ڕاگەیاندنی پەرلەمانی کوردستان بە SNNی ڕاگەیاند “لە كۆبوونه‌وه‌كه‌ى رۆژى 2020/11/15ى هه‌ر سێ سه‌رۆكایه‌تییه‌كه‌ی هه‌رێم، بڕیاردرا شاندی دانوستانكارى هه‌رێم بۆ گفتوگۆکردن لەگەڵ حکومەتی عێراق سه‌باره‌ت به‌پرسی نه‌وت و داهاتى ده‌روازه‌ سنوورییه‌كان و شایسته‌ داراییه‌كانی هه‌رێم، ڕاپۆرتێكی تێروته‌سه‌ل ئامادە بکات كه ‌تیایدا به‌وردى و به‌به‌ڵگه‌وه‌ په‌رله‌مانی كوردستان و رای گشتی له‌ده‌رئه‌نجامی كۆبوونه‌وه‌كانیان له‌گه‌ڵ حكومه‌تی فیدراڵیی عێراق ئاگادار بكه‌نه‌وه” .

وتیشی: “ئه‌مڕۆ پێنجشه‌مه‌ 2020/12/3، ئەو راپۆرتەی داوا کراوە، لەلایەن لیژنه‌ی دانوستانكار گه‌یشته‌ په‌رله‌مانی كوردستان و دواتر ئاراسته‌ی لیژنه‌ په‌یوه‌ندیداره‌كان و ‌سه‌رجه‌م ئه‌ندامانی په‌رله‌مان ده‌كرێت و دواتر بۆ رای گشتیش ده‌خرێته‌ڕوو”.