مامۆستایان هەڕەشەی بایکۆتکردنی تاقیکردنەوەکان دەکەن

SNN- هەوراز ئەحمەد

ژمارەیەکى بەرچاو لە مامۆستایان لەشارى سلێمانى هۆشدارى دەدەن بەحکومەت و مۆڵەتى یەک هەفتە دەدەن تا داواکارییەکانیان جێبەجێبکرێت، ئەو مامۆستایانە دەڵێن “ئەگەر لەو ماوەیەدا وەڵاممان نەبێت، بایکۆتى تاقیکردنەوەکانى کۆتایى ساڵ دەکەن”.

مەریوان فەتاح نوێنەرى مامۆستایان لە کۆنگرەیەکى ڕۆژنامەوانیدا ڕایگەیاند: پێویستە حکومەت تاوەکو وادەى تاقیکردنەوەکان دوو مووچە دابەشبکات، پێدانى مووچەش لە 30 ڕۆژ تێپەڕ نەکات”.

وتیشى: “داوامان ئەوەیە هەژمارێکى بانکى بۆ هەموو مامۆستایان و فەرمانبەران بکرێتەوە تا مووچە پاشەکەوتکراوەکانى بخرێتە سەر، کارگوزار و پاسەوانیش بۆ قوتابخانەکان دابمەزرێت، لەئەگەرى باشبوونى بارى دارایى حکومەت، قوتابخانەکان نۆژەنبکرێتەوە”.

ئەو کۆمەڵە مامۆستایە دەشڵێن “لەئەگەرى وەڵامنەدانەوەمان، ئەوا حکومەت بەرپرسە لە هەر ئەگەرێکى نەخوازراو و بایکۆتکردنى تاقیکردنەوەکانى وەرزى دووەم کە بڕیارە لە 1-6-2020 ئەنجامبدرێت، ئەگەرێکی زۆر نزیکە”.