ئێران: لەگەڵ تورکيا سەبارەت بە یەکپارچەیی خاکی عێراق هاوڕاین

SNN

وەزارەتی دەرەوەی ئێران رايگەياند: “وتەکانی باڵيۆزی ئێران لە بەغدا لێکدانەوەی هەڵەی بۆ کراوە و تاران و ئەنقەرە هاوڕان لەسەر پاراستنی يەکپارچەیی خاکی عێراق”.

سەعید خەتیب زادە وتەبێژی وەزارەتی دەرەوەی ئێران لەلێدوانێکی رۆژنامەنوسیدا باسی لەوەکرد:”لێدوانی ئیرەج مەسجدی باڵیۆزی ئێران لە بەغدا سەبارەت بە دەستوەردانەکانی تورکيا لە خاکی عێراق، بە هەڵە لێکدانەوەی بۆ کراوە”.

خەتيب زادە وتيشی:”هەڵەتێگەیشتن لە نێوان باڵیۆزانی ئەنقەرە و تاران روویداوە، جەخت لەسەر پاراستنی یەکێتی خاکی هەردوو وڵات و خاکی عێراقیش دەکەینەوە”.

لە ماوەی رابردوودا باڵیۆزانی ئێران و تورکیا رەخنەیان لەیەکتر دەگرت سەبارەت بە دەستوەردانی سەربازی یان بۆردومانی ئەو دوو وڵاتە لە هەرێمی کوردستان.

ئەمەش وایکرد باڵیۆزی ئێران بانگهێشتی وەزارەتی دەرەوەی تورکیا بکرێت و باڵیۆزی تورکیاش بانگهێشتی وەزارەتی دەرەوەی ئێران کرا، ئەمڕۆ ئێران بە لێدوانێک هەوڵی کۆتاییهێنان بەو بارگرژییە دەدات.