“هەوڵ هەیە لە کابینەکەى کازمى-دا کێشەکانى نێوان هەرێم و بەغدا چارەسەر ببن”
ئاڵای عێراق و کوردستان
-SNN هەوراز ئەحمەد
ئەندامێکى ئەنجومەنى نوێنەرانى عێراق ڕایدەگەنێت: چەند پێشنیازێک خراوەتە بەردەم کازمى سەبارەت بە کێشەکانى نێوان هەولێر و بەغدا و گەشبینین کە لەم کابینەیەدا بەشێک لەو کێشانە بگاتە چارەسەر”.
شیروان میرزا ئەندامى ئەنجومەنى نوێنەرانى عێراق بە SNNى ڕاگەیاند: شاندى هەرێم لەسەر ئاستى حکومەت و لەسەر ئاستى حیزبە سیاسییەکان چەند پێشنیازێکیان خستۆتە بەردەم کابینەکەى کازمى سەبارەت بەو کێشە کەڵەکبووانەى نێوان هەولێر و بەغدا.
دەشڵێت: گەشبینین و چاومان لەوەیە ئەو کێشانە لەم کابینەدا بگاتە ئاستى ڕێککەوتن، چونکە ئەمجارە حکومەتى هەرێم ئامادەیى خۆى دەربڕیوە بەوەى کە نەوت و داهات ڕادەستى بەغدا بکات، بۆیە ئێمە ئەوە بە هەنگاوێکى باش دەبینین”.
وتیشى: “پێشنیازەکان لە چوارچێوەى کێشەى بودجە و نەوت و پێشمەرگە و ناوچە دابڕێنراوەکان و مەترسى سەرهەڵدانەوەى داعشدایە کە بۆ کازمى کراوە و ئێمە بە هیواوە لەم کابینە نوێیە دەڕوانین”.
هاوکات ئاماژەى بەوەشکرد “بۆشاییەکى ئەمنى زۆر ئێستا لە ناوچە دابڕێنراوەکان هەیە کە مەترسى سەرهەڵدانەوەى داعش و گروپە توندڕەوەکانی لێدەکرێت، بۆیە پێویستە هەموو هەوڵەکان بەجدى کاریان لەسەر بکرێت، هەماهەنگى نێوان هێزى پێشمەرگە و هێزە عێراقییەکانیش زیاتر بکرێت بۆ ئەوەى داعش لەو ناوچانە تێکبشکێنرێتەوە”.
