بەوێنە:یانه‌ى شه‌تره‌نجى خانزاد شه‌ره‌فى رێكخستنى یه‌كه‌م چالاكی وه‌رزشى به‌ركه‌وت
یانه‌ى شه‌تره‌نجى خانزاد
سه‌نگه‌ر زرار-SNN Sport
پاش زیاتر له 75 رۆژى دابڕان له‌یارى شه‌تره‌نج و پاڵه‌وانێتییه‌كان، به‌هۆى بڵاوبوونه‌وه‌ى ڤایرۆسى كۆرۆنا و كه‌ره‌نتینه كردن و قه‌ده‌غه‌ی هاتووچۆوه، دواجار یانه‌ى شه‌تره‌نجى خانزاد-ى هه‌ولێر موژده‌كه‌ى خۆى بۆ شه‌تره‌نجزانانى كوردستان به‌گشتى و شارى هه‌ولێر به‌تایبه‌تى برده‌سه‌ر و یارى و پاڵه‌وانێتى شه‌تره‌نجى برده‌وه نێو هۆڵه‌كانى و یه‌كه‌م پاڵه‌وانێتى كراوه‌ى یارى شه‌تره‌نجى خێرا (بلیتز)ى به‌به‌شدارى ژماره‌یه‌كى زۆر له‌شه‌تره‌نجزانانى شاره‌كانى هه‌ولێر و سلێمانى له‌هه‌موو ته‌مه‌نه جیاوازه‌كاندا سه‌ركه‌وتووانه به‌ڕێوه‌برد و پاش تێپه‌ڕاندنى نه‌خۆشییه‌كه و قۆناغى ئاسایی بوونه‌وه‌ى شاره‌كانى كوردستان، شه‌ڕه‌فى رێكخستنى یه‌كه‌م چالاكى وه‌رزشى سه‌ر ئاستى هه‌موو كوردستانیشى به‌ركه‌وت.
پاڵه‌وانێتییه‌كه شه‌وى 14/15ى ئایارى 2020 له‌هۆڵى یانه‌ى شه‌تره‌نجى خانزاد به‌سیستمى سویسرى و به 9 جه‌وله ئه‌نجامدرا ماوه‌ى هه‌ر یاریه‌ك 3 خوله‌ك + 2 چركه بۆ هه‌ر جوڵه‌یه‌ك بوو، 60 یاریزانى كوڕ و كچى یارییه‌كه له‌ته‌مه‌نه جیاوازه‌كاندا تیایدا به‌شداربوون و ماوه‌ى چوار كاتژمێرى خایاند و شه‌تره‌نجزانى نێوده‌وڵه‌تى كورد و شارى هه‌ولێر (حسێن عه‌لى حسێن) به‌كۆكردنه‌وه‌ى 8.5 خاڵ پله‌ى یه‌كه‌مى ده‌سته‌به‌ركرد و شه‌تره‌نجزانى نێوده‌وڵه‌تى كورد و شارى سلێمانى (ئاكار عه‌لى ساڵح) پله‌ى دووه‌مى پاڵه‌وانێتییه‌كه‌ى به هه‌مان كۆى خاڵ برده‌وه و هه‌ریه‌كه له ئاریان عه‌لى ئیحسان له‌شارى سلێمانى و دیدار موحه‌مه‌د زاهیر له‌شارى هه‌ولێر پله‌كانى سێیه‌مى و چواره‌مى پاڵه‌وانێتیه‌كه‌یان به كۆكردنه‌وه‌ى 7 خاڵ پێبڕا.
دواجاریش خاوه‌نى پله‌كانى یه‌كه‌م تا چواره‌مى پاڵه‌وانێتیه‌كه خه‌ڵات كران و وه‌ك هاندانێك له‌سه‌ر ئاستى كچان و منداڵانیش خه‌ڵات بۆ به‌شداربووان ته‌رخانكرا و تیایدا هه‌ریه‌كه له تریفه نه‌جات به 4 خاڵ و رۆزیا فه‌خره‌دین به 3 خاڵ و هێڤار دیار به 3 خاڵ و هانا هاوار به 3 خاڵ و ئایه فه‌لاح به 2 خاڵ له‌كچان و یه‌شار دیدار به 5.5 خاڵ و لاوین موحه‌مه‌د به 5 خاڵ و ئه‌ریكار ئۆمێد به 4 خاڵ و عه‌بدولكه‌ریم رافى به 3 خاڵ و ئۆسكار بێستون به 3 خاڵ و سان سه‌نگه‌ر به 2 خاڵ له‌منداڵان خه‌ڵاتكران.
