شەوی رابردوو لە هەولێر چی روويدا؟

SNN

شەوی رابردوو دژە تيرۆری کوردستان رايگەياند: “بە فڕۆکەی بێفڕۆکەوانی بۆمبڕێژکراو هێرش کراوەتە سەر فڕۆکەخانەی نێودەوڵەتیی هەولێر”.

بەپێی زانيارييەکان هێرشەکە کاتژمێر 11:30 خولەکی شەوی رابردوو روويداوە، بە فڕۆکەی بێفڕۆکەوانی بۆمبڕێژکراو هێرش کرایە سەر فڕۆکەخانەی نێودەوڵەتیی هەولێر، هێرشەکە هیچ زیانێکی گیانی و ماددی نەبووە، تەنها ئاگر لە پووش و پەڵاش کەوتووەتەوە و تیمەکانی ئاگرکوژێنەوەئاگرەکەيان کۆنتڕۆڵکردووە.

لە دوای هێرشەکە، زەنگی ئاگادارکردنەوە لە کونسوڵخانەی گشتیی ئەمریکا لە هەولێر لێدرا و بۆ ماوەیەکیش رێگاکانی چوون بەرە فڕۆکەخانەی نێودەوڵەتیی هەولێر داخران و دواتر رێگەکان کرانەوە.

لەسەر هێرشەکە، ئومێد خۆشناو پارێزگاری هەولێر رايگەياند: “هێرشەکەی سەر فڕۆکەخانە هێرشێکی تیرۆریستییە، هیچ زیانێکی گیانی نەبووە و هێزە ئەمنییەکان و دەزگاکانی ئاسایش و دژەتیرۆری هەرێمی کوردستان لێکۆڵینەوەیان دەستپێکردووە، ئامانجی هێرشەکە شاری هەولێر بووە”.

وتيشی “بەتووندی ئیدانەی ئەو هێرشە دەکەين و داوا لە هاوپەیمانان و حکومەتی عێراقی دەکەين کە لێکۆڵینەوەی جیددی لەو هێرشانە بکەن کە دەکرێنە سەر هەولێر و فڕۆکەخانەی نێودەوڵەتیی هەولێر”.

ئەم هێرشە دوای ئەوە دێت کە رۆژی 26ی حوزەیرانی  2021سێ درۆن “فڕۆکەی بێفڕۆکەوان” لە رێگەی خۆپێداکێشان خۆیان بە خانووی ھاووڵاتییەک لە باخچەکانی سەر رێگەی سێولە لە گوندی براغ نزیک کۆمەڵگەی مەلا ئۆمەر لە پارێزگای ھەولێر دا کە دوو لەو درۆنانە تەقینەوە و یەکێکیان نەتەقییەوە.