ئاسایشی سلێمانی: ژمارەیەك لە دەستگیركراوان بە بارمتەی یاسایی ئازاد دەكرێن
SNN
وتەبێژی ئاسایشی سلێمانی لەبارەی دەستگیركردنی ژمارەیەك تۆمەتبار لەكاتی خۆپیشاندانەكەی پیرەمەگرون رايگەياند: تۆمەتبارەكان لەسەر فەرمانی دادوەری لێكۆڵینەوەی ئاسایش سلێمانی دەستگیركراون و بەپێی یاسا مامەڵەیان لەگەڵ دەكرێت.
موقەدەم یاسین سەمیع وتەبێژی ئاسایشی پارێزگای سلێمانی بە ماڵپەڕی فەرمی يەکێتی راگەیاند: تۆمەتبارەكان لەسەر فەرمانی دادوەری لێكۆڵینەوەی ئاسایش سلێمانی دەستگیركراون و بەپێی یاسا مامەڵەیان لەگەڵ دەكرێت، تەئكیدیشیكردەوە: دوای رێوشوێنە یاساییەكان ژمارەیەكیان بەبارمتەی یاسایی و بەفەرمانی دادوەری لێكۆڵینەوە ئازاد دەكرێن.
سەبارەت بەڕەنگی جلوبەرگی تۆمەتبارەكان وتەبێژی ئاسایشی پارێزگای سلێمانی رایگەیاند: بەپێی یاساو رێنمایی رێكخراوە نێودەوڵەتیەكان زیندانیان بەپێی ستاندارد دەبێ جلوبەرگی زیندانی یەك پۆشی بێت و سەبارەت بەڕەنگەكەشی رایگەیاند رەنگێكی جیهانی پەیڕەو كراوەو پەیوەندی بەجۆری تۆمەتەكەوە نیە.
موقەدەم یاسین سەمیع دڵنیایشیدا لەوەی بەردەوام رێكخراو نێودەوڵەتیەكانی وەك خاچی سووری نێودەوڵەتی و رێكخراوەكانی مافی مرۆڤ و سەرجەم رێكخراوە تایبەتمەندەكان سەردانی زیندانیان لەئاسایشی سلێمانی دەكەن و ئاسایشی سلێمانی پەیڕەوی یاسا نێودەوڵەتیەكان دەكات.
