روسيا هێز دەنێرێت بۆ کۆنتڕۆڵکردنی دۆخی کازاخستان
SNN
خۆپيشاندانەکانی کازاخستان بەردەوامی هەيە و پاش هەڵوەشاندنەوەی حکومەت لەلايەن سەرۆکی ئەو وڵاتەوە، بەمەبەستی کۆنتڕۆڵکردنی گرژييەکان روسيا هێزی ئاشتی پارێز دەنێرێتە کازاخستان.
خۆپیشاندانەکان لەسەرەتای ئەم مانگەوە لەشارەکانی رۆژئاوای كازاخستانەوە دەستیپێکردوە دژی بەرزبونەوەی بەهای سوتەمەنی و بەتایبەت نرخی غاز، لەبەرامبەریشدا قاسم جومارتی سەرۆکی کازاخستان حکومەتی وڵاتەکەی هەڵوەشاندەوە و رایگەیاند: وەزیرەکان و حکومەت بەرپرسیارن لەو دۆخەی بەسەر وڵات هاتووە.
دوای ئەوەی بەشێک لە بينا حکومييەکان سوتێنران و فڕۆکەخانەی نێودەوڵەتی ئەڵماتی لەلايەن خۆپيشاندەرانەوە دەستی بەسەردا گيرا، نيکۆڵ پاشينيان سەرۆکوەزيرانی ئەرمينيا لە فەيسبوک رايگەياند: روسيا هێزی ئاشتی پارێز دەسنێرێتە کازاخستان بەمەبەستی گێڕانەوەی سەقامگيری.
کۆماری کازاخستان وڵاتێکە دەکەوێتە، ئاسيای ناوەڕاست لە باکور و رۆژئاواوە هاوسنوورە لەگەڵ روسيا، لە رۆژهەڵاتيشەوە هاوسنوورە لەگەڵ چين، هەريەک لە قيرخزستان، ئۆزباکستان، تورکومانستان دەکەونە باشووری ئەو وڵاتە.
