جێگرەکەی ئەبوبەکر بەغدادی دەستگیرکرا

SNN

دەزگای هەواڵگری عێراقی لە راگەیەندراوێکیدا هەواڵی دەستگیرکردنی عەبدولناسر قارداش-یان بڵاوکردەوە کە دوای مردنی ئەبوبەکر بەغدادی وەک جێگری خەلیفە دانرابوو. 

شەوی رابردوو میدیای عێراقی هه‌واڵی ده‌ستگیركردنی عه‌بدولناسر قارداش، كه‌ به‌ربژێرێک بوو بۆ شوێنگرتنه‌وه‌ی ئه‌بوبه‌كر به‌غدادی، بڵاوكرده‌وه‌، ئەو چەکدارە بەپێی زانیارییەکانی شانەی راگەیاندنی ئەمنیی عێراق، لە 2007 پەیوەندی بە رێکخراوی قاعیدە کردووە لە پارێزگای نەینەوا، وەک کەسێکی ئیداری ویلایەتی جەزیرە تاوەکو کۆتایی ئەمساڵ کاریکردووە، پۆستی والی جەزیرەی وەرگرتووە، لە ماوەی پۆستەکەیدا چەند هێرش و پەلامار بۆ سەر هێزە عێراقییەکان و هاووڵاتیان ئەنجامدراون.

وەک لە راگەیەندراوی دەزگای هەواڵگری عێراقدا هاتووە ئاماژە بەوە دەکات، کە چەند زانیارییەکی وردیان هاتۆتە دەست سەبارەت بە شوێنی مانەوە و هاتووچۆکردنی ناسر قارداش دوای بەدواداچوون و چاودێری کردن توانرا لە 20 ئایاردا دەستگیربکرێت.

لە ئۆپراسیۆنێکی تایبەتی هێزەکانی ئەمریکا لە ئیدلیب-ی سوریا لە ساڵی 2019 توانرا ئەبوبەکر بەغدادی و کۆمەڵێك لە کەسانی داواکراو بکوژرێت، جەند رۆژێک دوای مردنی خەلیفەی داعش، عەبدولناسر قارداش وەک جێگرەوەی ئەبوبەکر بەغدادی دانرا.