داوا ده‌كرێت په‌رله‌مان له‌سه‌ر به‌رزبوونه‌وه‌ى نرخى خۆراك كۆبێته‌وه
كڕیارێك له‌كاتى كڕینى خواردندا | فۆتۆ: FAO
SNN
ئه‌ندامێكى ئه‌نجوومه‌نى نوێنه‌رانى عێراق له هاوپه‌یمانى فه‌تح داواده‌كات په‌رله‌مان له‌سه‌ر به‌رزبوونه‌وه‌ى نرخى خۆراك له عێراق كۆبوونه‌وه‌یه‌كى نا ئاسایی ئه‌نجام بدات و ده‌ڵێت: “ناكرێت ده‌رگاى په‌رله‌مان بۆ دووباره كردنه‌وه‌ى پرۆسه‌ى خۆكاندید كردن بۆ پۆستى سه‌رۆككۆمار بكه‌یته‌وه، به‌ڵام قه‌یرانى به‌رزبوونه‌وه‌ى نرخى خۆراك هه‌بێت خۆتى لێ بێده‌نگ بكه‌یت”.
ئه‌مڕۆ سێشه‌ممه 8ى مارس، فازڵ جابر، ئه‌ندامى ئه‌نجوومه‌نى نوێنه‌رانى عێراق له هاوپه‌یمانى فه‌تح رایگه‌یاند، “داوامانكردووه ئه‌نجوومه‌نى نوێنه‌رانى عێراق كۆبوونه‌وه‌یه‌كى نا ئاسایی ئه‌نجامبدات سه‌باره‌ت به به‌رزبوونه‌وه‌ى نرخى خۆراك له بازاڕه‌كاندا و حكومه‌ت ناچاربكات یارمه‌تى چینى هه‌ژار بدات”.
وتیشى: “خه‌ڵكى عێراق خۆیان فشارێكى زۆریان له‌سه‌ره، ناكرێت فشارى تریش بۆ ژیانیان دروستببێت”.
ئه‌و ئه‌ندامه‌ى ئه‌نجوومه‌نى نوێنه‌رانى عێراق باس له‌وه‌شده‌كات، “ئێستا نرخى نه‌وت به‌رزبووه‌ته‌وه و دۆخى دارایی عێراق باشه، ده‌كرێت پاره زیاده‌كه به‌كاربهێنرێت بۆ باشتركردنى دۆخى دارایی هاووڵاتییان”.
قسه‌كانى ئه‌و ئه‌ندامه‌ى ئه‌نجوومه‌نى نوێنه‌رانى عێراق له‌كاتێكدایه كه له ماوه‌ى رابردوودا باسم عكیلى، به‌ڕێوه‌به‌رى گشتى كۆمپانیاى بازرگانى گه‌نم له وه‌زاره‌تى بازرگانى عێراق رایگه‌یاند، “نرخى خۆراك له عێراقدا له‌دواى ده‌ستپێكردنى شه‌ڕى سووریا و ئۆكرانیا به‌ڕێژه‌ى 23٪ به‌رزبووه‌ته‌وه”.
