پاش 34 ساڵ لە كیمیابارانی هەڵەبجە هێشتا لە %70 شەهیدەكان لە گۆڕەبەكۆمەڵەكاندا
فۆتۆ -عەلی حەمە-سەعید-مەزاری-شەهیدانی هەڵەبجە
SNN-عەلی حەمە سەعید
لوقمان عەبدولقادر سەرۆكی كۆمەڵەی قوربانیانی كیمیابارانی هەڵەبجە بە SNNی ڕاگەیاند: تائێستا 53 گۆڕی بەكۆمەڵی شەهیدانی كیمیابارانی هەڵەبجە لەسنووری پارێزگای هەڵەبجە دۆزراونەتەوە هاوكات تا ئێستا چوار گۆڕیان هەڵدراونەتەوە كە لە یەكێك لە گۆڕەكاندا 34 ڕوفاتی تێدابوو و بەهۆی هەڵدانەوەی ئەو گۆرەوە و مانەوەی كاریگەری چەكی كیمیایی لەسەر ڕوفاتەكان سێ كەسی دیكە گیانیان لەدەستدا كە لەهەڵدانەوەی ئەوگۆڕەدا كاریان كردبوو.
ئاماژەی بەوەشكرد، لە %68 قوربانیانی ناوگۆرەبەكۆمەڵەكان لە خوار تەمەنی 18 ساڵییەوەن لەهەمان كاتدا زیاتر لە%70 قوربانیانی شەهیدانی كیمیاباران لەناوگۆڕە بەكۆمەڵەكاندان بەجۆرێك كە تەنها لەیەك گۆڕی بەكۆمەڵی شەهیدانی كیمیاباران زیاتر لە هەزارو 500 شەهیدی تێدایە.
سەرۆكی كۆمەڵەی قوربانیانی كیمیابارانی هەڵەبجە ئەوەشی خستەڕوو، بەهۆی ترس لەمانەوەی كاریگەری چەکی كیمیایی لەسەر ڕوفاتی شەهیدانی ناوگۆڕەبەكۆمەڵەكان و نەبوونی تیمی تایبەت ناتوانین دەست بەهەڵدانەوەی گۆڕەكان بكەین لەگەڵ ئەوەشدا هەندێك لەكەسوكاری شەهیدەكانیش ناڕازیین لەهەڵدانەوەی ئەوگۆڕانە.
