بانكی ناوەندی عێراق بڕێكی زۆر دۆلار دەخاتە بازاڕەوە و پسپۆڕێكی ئابووریش باس لەكاریگەرییەكانی دەكات

SNN-عەلی حەمە سەعید

بانكی ناوەندی عێراقی بڕیاریداوە كە ڕۆژانە بڕێكی زیاتر دۆلار بخاتە بازاڕەكانەوە، پسپۆڕێكی دارایی و ئابووریش باس لەوەدەكات كە مەبەستی بانكی ناوەندی پاراستنی هاوسەنگی نرخی دۆلار و دینارەو هاوكات تاڕادەیەكیش كاریگەری دەبێت لەسەر كەمبوونەوەی نرخی كاڵاو شمەك لەبازاڕەكاندا.

ئەحمەد حاجی ڕەشید، شارەزار لە كاروباری دارایی و ئابووری و پەرلەمانتاری خولی پێشووی پەرلەمانی عێراق بە SNNی ڕاگەیاند: خستنەبازاڕی بڕێكی زیاتر لە دۆلار لەلایەن بانكی ناوەندی عێراقییەوە مەبەستی تایبەتی لە پشتەوە، لە لایەك دەیانەوێت هاوسەنگی لەنێوان نرخی دینار و دۆلار ڕاگیر بكەن و لەلایەكی دیكەش بانكی ناوەندی عێراق نایەوێت لەوەزیاتر نرخی دۆلار بەرز ببێتەوە و 100 دۆلار نزیك ببێتەوە لە 150 هەزار دینار.

ئاماژەی بەوەشكرد، بەهۆی ئەوەی لە ئێستادا عێراق ڕۆژانە بڕێكی زۆر نەوت دەفرۆشێت و داهاتەكەشی بەدۆلارە ئەمە وادەكات كە ڕۆژانە بڕێكی زۆر دۆلار بێتە بانكی ناوەندی عێراقەوە، بۆ ساغكردنەوەی ئەو دۆلارەش بانكی ناوەندی بڕێكی زۆری دەخاتە بازاڕەوە، ئەمە وادەكات كە هاوسەنگی لەنێوان نرخی دینار و دۆلاردا جێگیر ببێت.

ئەو شارەزایەی بواری دارایی و ئابووری ئەوەشی ڕوونكردەوە، خستنەڕووی زیاتری دۆلار لەلایەن بانكی ناوەندی عێراقییەوە تاڕادەیەك كاریگەری لەسەر نرخی كاڵاو شەمەك دەبێت و نرخەكان هەرزانتر دەكات، بەتایبەت ئەو كاڵاو شەمەكانەی كە بە دۆلار لەدەرەوە هاوردە دەگرێن، چونكە كاتێك نرخی دۆلار هەرزان بیت و ئەوا ڕاستەوخۆ نرخی ئەو كاڵاو شەمەكانەش هەرزان دەبێت كە بە دۆلار كڕدراون.