لەبارەی زیادكردنی كاتژمێرەكانی كارەبا لە هاوینی ئەمساڵ ڕوونكردنەوە دەدرێت

SNN-عەلی حەمە سەعید

وتەبێژی وەزارەتی كارەبای حكومەتی هەرێم ئاماژە بەوەدەكات لەمانگی نیسان بەتێكڕا نزیكەی 19 كاتژمێر كارەبامان بۆ هاووڵاتیان دابینكردووە، هاوكات لە كۆتایی ئەم مانگەشدا بڕی كارەبای دابینكراو بۆ مانگی ئایارو هاوكات خەمڵاندن بۆ بڕی كارەبای پێویست بۆ مانگی حوزەیران دەكەین، دەشڵێت لە ئەمشەوەوە كارەبای 48 كاتژمێری بۆ پارێزگای دهۆك دابیندەكەین.

ئومێد ئەحمەد، وتەبێژی وەزارەتی كارەبای حكومەتی هەرێم بە SNNی ڕاگەیاند: ئێمە لە وەزارەتی كارەبا مانگە لە كۆتایی هەر مانگیكدا ڕاپۆرتی خۆمان ئامادەدەكەین بۆ ئەوەی بزانین كۆی كارەبای دابینكراو بۆ هاوبەشەكانمان چەندە و هەروەها بڕی خواستیش چەند بووە، بۆیە ئەوەی ئێستا لەبەردەستماندایە ئەوەیە كە توانیمان لە مانگی نیساندا بە تێكڕا بڕی 18 تا 19 كاتژمێر كارەبا بۆ هاوبەشەكانمان دابینبكەین.

ئاماژەی بەوەشكرد، بۆ ئەم مانگە و هەروەها بۆمانگی داهاتووش كە بزانین چەندە كارەبامان دابینكردووە و بۆمانگی داهاتووش چەند كارەبامان پێویست دەبێت، ئەوا لەكۆتایی ئەم مانگەدا كۆبوونەوەی تایبەت بە وەزارەتی كارەبا ئەنجام دەدەین و لەو كۆبوونەوەیەدا وردەكاری بڕی كارەبای دابینكراو هەروەها خواستی هاووڵاتیانیش بۆ كارەبا دەخیەنە ڕوو بۆیە جارێ‌ نازانین بۆ وەرزی هاوین دۆخی كارەبا چۆن دەبێت چونكە پلەكانی گەرما و كەمئاوی و وشەكە ساڵی كاریگەری خۆیان دەبێت لەسەر وێتگەكانی بەرهەمهێنانی كارەبا.

وتەبێژەكەی وەزارەتی كارەبای حكومەتی هەرێم ئەوەشی ڕوونمردەوە، دوای ئەوەی لە پارێزگاكانی سلێمانی و هەولێر و هەڵەبجە و ئیدارەكانی گەرمیان و ڕاپەڕین وەك كۆكردنەوەی زانیاری لەسەر خواستی هاووڵاتیان بۆ كارەبا بۆماوەی 48 كاتژمێر كارەبای بەردەواممان دابینكرد، ئەوا لە ئەمشەویشەوە بەهەمان شێوە بۆ پارێزگای دهۆكیش كارەبای 48 كاتژمێری دابیندەكەین و دواتر ڕاپۆرتی خۆمان ئامادەدەكەین لەبارەی بڕی خواستی هەر پارێزگایەك بۆ كارەبا.