هەڵەبجەییەكان داوای دۆزینەوەی 118 منداڵی ونبوو دەكەن

SNN-عەلی حەمەسەعید
لەڕۆژی جیهانی منداڵەونبووەكاندا كە هاوكاتە لەگەڵ ئەمڕۆ 25ی ئایار، كۆمەڵەی قوربانیانی كیمیابارانی هەڵەبجە، ئاماری منداڵانی ونبووی هەڵەبجەیان ئاشكرا كرد و 66 خێزانی هەڵەبجە لە چاوەڕوانی دۆزینەوەی 118 منداڵی ونبووی كاتی كیمیابارانی هەڵەبجەن.

لوقمان عەبدولقادر، سەرۆكی كۆمەڵەی قوربانیانی كیمیابارانی هەڵەبجە، بە SNNی ڕاگەیاند: ئەمڕۆ چوارشەممە كە هاوكاتە لەگەڵ ڕۆژی جیهانی مندڵانی ونبوو بەپێی ئەو ئامارانەی لەگەڵ لێژنەی منداڵە ونبووەكانی پارێزگای هەڵەبجە وەرمانگرتووە، 66 خێزان لەچاوەڕوانی دۆزینەوەی  118 منداڵن كە لەكاتی كیمیابارانی هەڵەبجەدا لە خێزانەكانیان دابڕوان، بەگوێرەی بەدواداچوونەكانی ئێمەش ژمارەیەكی زۆرلەو منداڵەونبووانە لە ئێران، لە كات كیمیابارانی هەڵەبجە لە كەسوكاریان دابڕاون و دواتر دراون بە ژمارەیەك خێزانی ئێرانی.

ئاماژەی بەوەشكرد، لەئێستادا چوارمنداڵی ونبووی كە بانگەشەی ئەوە دەكەن خەڵكی هەڵەبجەن لەم ماوەی دواییدا پەیوەندییان پێوە كردووین و باس لەوە دەكەن، كە منداڵی ونبووی هەڵەبجەن، كە دانەیەكیان لە كەركووكە و ئەوانی دیكەیان لە دەرەوەی هەرێمی كوردستانن.

25/5/ی هەموو ساڵێك بە ڕۆژی جیهانی منداڵانی ونبوو دیاریكراوە، لەم ڕۆژەشدا لە زۆرێك لە وڵاتانی جیهان چالاكی تایبەت بەو بۆنیەوە بەڕێوەدەچێت