ژووری بازرگانی سلێمانی بە چالاكترین ژوور لەسەر ئاستی عێراق هەڵدەبژێردرێت

SNN-عەلی حەمە سەعید
سەرۆكی ژووری بازرگانی و پیشەسازی سلێمانی ئاشكرایكرد كە ڕۆژی چوارشەممەی ئەم هەفتەیە سەرجەم ژووری بازرگانییەكانی عێراق و هەرێمی كوردستان لەشاری سلێمانی كۆدەبنەوە و لە مەراسیمێكی تایبەتدا بڕوانامەی ڕێزلێنان دەدرێتە ژوری بازرگانی و پیشەسازی سلێمانی وەك چالاكترین ژوری بازرگانی لەسەر ئاستی عێراق و هەرێمی كوردستان، ئەوەش بۆیەكەمجارە بڕوانامەیەكی لەوجۆرە بدرێتە ژورە بازرگانییەكان.  

سیروان محەمەد، سەرۆكی ژووری بازرگانی‌ و پیشەسازی سلێمانی بە SNNی ڕاگەیاند: بڕیاردراوە ڕۆژی چوارشەممە 15/6/2022 كۆبوونەوەی ئەمجارەی یەكێتی ژوورە بازرگانییەكانی عیراق لەشاری سلێمانی ساز بكرێت  لە ئێستادا ژووری بازرگانی‌و پیشەسازی سلێمانی ئامادەكاری دەكات بۆ بەڕێوەچوونی كۆنگرەكە و میوانداری كردنی وەفدی ژوورە بازرگانییەكانی عیراق‌ و هەرێمی كوردستان، كە بۆنەیەكی گرنگەو جێی بایەخپێدانی هەموو ناوەندە ئابوورییەكان‌و میدیاكانی كوردستان‌و عیراقیشە.

ئاماژەی بەوەشكرد، هەر لەو كۆبوونەوەیەی ڕۆژی چوار شەممە بڕیارە بڕوانامەی ڕێزلێنان ببخەشرێت بەژووری بازرگانی‌و پیشەسازی سلێمانی بەو پێیەی چالاكترین ژووری بازرگانی‌و پیشەسازیی بووە لەسەر ئاستی عیراق و هەرێمی كوردستان لەماوەی ساڵی ڕابردوودا ئەوەش بۆ یەكەمجارە لەمێژووی ژوورە بازرگانی‌و پیشەسازییەكانی عیراق دا، خەڵاتی ڕێزلێنان ببخەشرێت بەژوورێكی بازرگانی‌و پیشەسازی‌و وەك چالاكترین ژوور لەسەر ئاستی عیراق هەڵبژێردرێت‌.

سەرۆكی ژووری بازرگانی و پیشەسازی سلێمانی جەختی لەوەشكردەوە، هەڵبژاردنی ژووری بازرگانی و پیشەسازی سلێمانی وەك چالاكترین ژوری بازرگانی لەسەر ئاستی عێراق بۆ ئەوە دەگەڕێتەوە كە ئێمە لەكۆبوونەوە نێودەوڵەتییەكان ئامادە بووین‌و توانیومانە گەورەترین پشك رابكێشین لەسەر ئاستی عیراق لەوەرگرتنی وەكالەتی بازرگانی‌و  تۆماركردنی هێمای بازرگانی ‌ودروستكردنی پێشانگایەكی نێودەوڵەتی، هاوكات بەبەردەوامی كارمان كردوە بۆ بازرگانان‌و كێشەو گرفتی بازرگانانمان گەیاندوە بەلایەنە پەیوەندیدارەكانی حكومەتی هەرێمی كوردستان‌و هەوڵمانداوە ڕەوشی ئابوری شاری سلێمانی بەرەو پێش بەرین‌و گەشەی ئابوری بەردەوام لەهەموو سیكتەرەكانی پیشەسازی‌و كشتوكاڵی‌و بازرگانیدا دەستەبەر بكەین