“10 هه‌زار سینگڵ فۆڕمیان پڕكردووه‌ته‌وه بۆ وه‌رگرتنى شوقه”
SNN
به‌پێى ئامارێكى ده‌سته‌ى گشتى وه‌به‌رهێنان تاوه‌كو ئێستا 90 هه‌زار كه‌س فۆڕمیان پڕكردووه‌ته‌وه بۆ وه‌رگرتنى شوقه كه نزيکەی 10 هه‌زاریان هاوسه‌رگیرییان نه‌كردووه.
له ماوه‌ى رابردوودا ده‌سته‌ى گشتى وه‌به‌رهێنانى حكومه‌تى هه‌رێمى كوردستان دروستكردنى 20 هه‌زار یه‌كه‌ى نیشته‌جێبوونى بۆ ئه‌و كه‌سانه راگه‌یاندن كه كرێچین و به‌پێى نوێترین ئاماریش كه له‌لایه‌ن ده‌سته‌ى گشتى ئامارى هه‌رێمى كوردستانه‌وه بڵاوكراوه‌ته‌وه، “تاوه‌كو ئێستا 90 هه‌زار كه‌س فۆڕمه‌كه‌یان پڕكردووه‌ته‌وه كه 9 و 675 یان هاوسه‌رگیرییان نه‌كردووه و 80 هه‌زار و 478 كه‌سیشیان خێزاندارن”.
هه‌ر له‌و باره‌یه‌وه گۆران عه‌وێنه‌یی، سه‌رۆكى كۆمه‌ڵه‌ى كرێكارانى كوردستان له نوێترین لێدوانى رۆژنامه‌وانیدا رایگه‌یاند، “هیواخوازین زۆرترین ژماره‌ى كرێكارى كرێنیشین بتوانن سوود له‌م شوقانه وه‌ربگرن و له‌دواى پڕكردنه‌وه‌ى فۆڕمه‌كه‌ش چاودێرى ره‌وشه‌كه ده‌كه‌ین بۆ ئه‌وه‌ى زۆرترین ژماره‌ى كرێكار سوودمه‌ند بن”.
وتیشى: “تا ئێستا نازانین چه‌ند كرێكار پڕیانكردووه‌ته‌وه، به‌ڵام به هیواین ئه‌م بابه‌ته زۆرترن سوود به كرێكاران بگه‌یه‌نێت”.
