سبەینێش بۆماوەی چوار كاتژمێر هێڵەكانی ئینتەرنێت لەهەرێمی كوردستان ڕادەگیرێن

SNN-عەلی حەمە سەعید

ئەگەر چی ڕۆژی پێنجشەممەی ڕابردوو 21ی تەمموز كۆتایی بە تاقیكردنەوە سەرەكییەكانی پۆلی 12ی ئامادەیی بە هەردوو بەشی وێژەیی و زانستی هات، بەڵام سبەی دوو شەممە 25ی تەمموز بەهۆی ئەنجامدانی تاقیكردنەوەی تایبەت بە زمانی سریانی و پەروەردەی مەسیحی، وەزارەتی گواستنەوە و گیاندن كۆمپانیاكانی دابینكەری هێڵی ئینتەرنێتی ناچار كردووە سبەینێش بۆماوەی چوار كاتژمێر هێڵەكانیان ڕابرگرن.

بەگوێرەی ئەو زانیارییانەی كە لە وەزرەتی گواستنەوە و گەیاندن بە SNNدراون ئەوەخراوەتەڕوو، سەرجەم كۆمپانیاكانی دابینكەری ئینەتەرنێت لە هەرێمی كوردستان ئاگاداركراونەتەوە كە سبەی دووشەممە 25/7/2022 هاوشێوی ڕۆژانی پینج شەممە و دووشەممەی هەفتەكانی ڕابردوو بۆماوەی چوار كاتژمێر هێڵەكانی ئینتەرنێت ڕابگرن.

ئاماژەی بەوەشكرد، ڕاگرتنی هێڵەكانی ئینتەرنێت لە سبەی دووشەممە بەهۆی بەڕێوەچوونی تاقیكردنەوەكانی زمانی سریانی و پەروەردەی مەسیحییە لە پۆلی 12 بۆ هەردوو بەشی زانستی و وێژەیی، بۆیە لە كاتژمێر شەش و 30 خولەك بۆ كاتژمێر 10 و 30 خولەك هێڵەكان ڕادەگیرێن.

لە زانیارییەكانی SNN ئەوەشهاتووە كە بەشیك لە كۆمپانیاكان پابەند بوونی خۆیان ڕاگەیاندووە بەقەرەبووكردنەوەی بەشداربووەكانیان بەهۆی ئەوەی لەم مانگەدا ڕۆژانی دووشەممە و پێنج شەممە بۆماوەی چوار كاتژمێر هێڵەكانیان ڕاگیراوە، بەڵام بەشێكی دیكەشیان ئامادەی قەرەبووكردنەوەنین بە بیانووی ئەوەی فەرمانی وەزارەتی گواستنەوەیان جێبەجێكردووە.