“پێویسته خۆپیشانده‌ران ده‌ستبه‌جێ زۆنى سه‌وز به‌جێبهێڵن”
خۆپیشانده‌رانى به‌غدا له‌سه‌ر پردى كۆمارى له به‌غدا | فۆتۆ: SNN
SNN
سه‌رۆكوه‌زیرانى عێراق رایگه‌یاند، پێویسته خۆپیشانده‌ران ده‌ستبه‌جێ زۆرنى سه‌وز به‌جێبهێڵن.
دره‌نگانى شه‌وى رابردوو 26ى ته‌مموز، له به‌غدا خۆپیشانده‌ران گه‌مارۆى ماڵى محه‌مه‌د شیاع سودانی، كاندیدى سه‌رۆكوه‌زیرانى عێراقیاندا و تاوه‌كو ئێستا خۆپیشاندان به‌رده‌وامه به دروشمى، “به فه‌رمانى گه‌ل ره‌تیده‌كه‌ینه‌وه محه‌مه‌د شیاع سودانى ببێته سه‌رۆكوه‌زیرانى عێراق”.
كه‌مێك له‌مه‌وبه‌ر خۆپیشانده‌رانى به‌غدا چوونه نێو ناوچه‌ى سه‌وز له به‌غدا و به دیاریكراوى گه‌یشتنه به‌رده‌م ئه‌مینداریه‌تى ئه‌نجوومه‌نى وه‌زیران و په‌رله‌مانى عێراق.
مسته‌فا كازمى، سه‌رۆكوه‌زیرانى عێراق رایگه‌یاند، “ئێمه وه‌ك ئه‌ركى سه‌رشانمان دامه‌زراوه نێوده‌وڵه‌تیه‌كان و نوێنه‌رایه‌تیه دیپلۆماسییه‌كان و دام و ده‌زگاكانى حكومه‌ت ده‌پارێزین و هیوادارین خۆپیشانده‌رانیش پابه‌ندبن به ئه‌نجامدانى خۆپیشاندانێكى ئاشتیانه”.
وتیشى: “پێویسته خۆپیشانده‌ران ده‌ستبه‌جێ زۆرنى سه‌وز به‌جێبهێڵن”.
خۆپیشاندانى به‌غدا له‌كاتێكدایه كه ماوه‌ى چه‌ند رۆژێكه زۆرینه‌ى لایه‌نه سیاسییه‌كانى عێراق محه‌مه‌د شیاع سودانیان كاندید كردووه بۆ وه‌رگرتنى پۆستى سه‌رۆكوه‌زیرانى عێراق.
