تەندروستی راپەڕین سەبارەت بە توشبوونی هاوڵاتیەکی رانیە بە کۆڕۆنا رونکردنەوە دەدات

SNN-محەمەد مستەفا

هاووڵاتیەکی خەڵکی قەزای رانیە دوای گەڕانەوەی لە وڵاتی ئێران توشی ڤایرۆسی کۆڕۆنا دەبێت و بەرپرسی راگەیاندنی تەندروستی راپەڕینیش دەڵێت “ئەو هاوڵاتیە لە سلێمانی کەرەنتین کراوە و نەگەڕاوەتەوە سنوری ئیدارەی راپەڕین و تێکەڵی خەڵکی نەبووە “

تەها محەمەد بەرپرسی راگەیاندنی تەندروستی راپەڕین بە SNNی راگەیاند: “وەزارەتی تەندروستی راگەیەنراوێکی بڵاو کردووەتەوە کە هەشت کەسی تر توشی ڤایرۆسی کۆڕۆنا بوون، کە یەکێک لە توشبووەکان خەڵکی قەزای رانیەیه و لە وڵاتی ئێران گەڕاوەتەوە”.

وتیشی: “ئەو هاووڵاتیە لە دوای گەڕانەوەی لە وڵاتی ئێران لە رێگەی مەرزی باشماخەوە، پشکنینی بۆ کراوە و لە سلێمانی کەرەنتین کراوە، پاشان دەرکەوتووە کە هەڵگری ڤایرۆسی کۆڕۆنایە”.

باسی لەوەشکرد: “هاووڵاتیانی راپەڕین دڵنیا دەکەنەوە کە ئەو هاووڵاتیە بە هیچ شێوەیەک نەگەڕاوەتەوە ئیدارەی راپەڕین و تێکەڵی هیچ دانیشتوویەکی راپەڕین نەبووە”.

تەها محەمەد ئاماژە بۆ ئەوەشکرد: “ماوەی زیاتر لە مانگێکە هیچ حاڵەتێکی ڤایرۆسی کۆڕۆنا لە سنوری ئیدارەی راپەڕین تۆمار نەکراوە و کەرەنتینەکانیش چۆڵکراون”.