نوێترین زانیاری لە بارەی چارەنوسی ئەو كۆچبەرانەی لە یەختەكەی یۆنان ژێر ئاوكەوتن

SNN-عەلی حەمەسەعید
دوای ئەوەی لە چەند ڕۆژی ڕابردوودا یەختێك كە 70 كۆچبەری هەڵگرتبوو لە سنوورە ئاوییەكانی یۆنان ژێرئاو كەوت، تا ئێستا 22 تەرم لەناو سەرنشینانی ئەو یەختەدۆزراونەتەوە و هاوكات 12 كۆچبەریش بە زیندوویی ڕزگار كراون، بە وتەی نوێنەری دەزگای لوتكە بۆ كاروباری ئاوارە و پەنابەران بەمەبەستی ئاشكراكردنی چارەنوسی كۆچبەرەكانی دیكە گەڕانی تیمەكان بەردەوامی هەیە.

ئاری جەلال، سەرۆكی دەزگای لوتكە بۆ كاروباری ئاوەرە و پەنابەران بە SNNی ڕاگەیاند: لەنوێترین زانیاریدا كە لە نوێنەری دەزگای لوتكە لە وڵاتی یۆنان وەرمانگرتووە، ژمارەی تەرمە دۆزراوەكان گەیشتوونەتە 22  تەرم كە پێكهاتوون لە 11 پیاو شەش ژن و پێنج منداڵ كە سیانیان كوڕ و دوو منداڵی دیكەشیان كچن.

ئاماژەی بەوەشكرد، بەمەبەستی ئاشكراكردنی چارەنوسی كۆچبەرەكانی دیكە، تیمەكانی دەریاوانی یۆنان گەڕان و پشكنینەكانیان بەردەوامە، هاوكات پۆلیسی كەناراوەكانی یۆنان سەرقاڵی گواستنەوەی تەرمەكانن بۆ نەخۆشخانەی كاریستۆس و تا ئێستاش ناسنامەی هیچ یەك لە كۆچبەرەكان دیارنییە.

وتەكانی سەرۆكی دەزگای لوتكە بۆ كاروباری ئاوەرە و پەنابەران لەكاتێكدایە كە شەوی 31ی مانگی رابردوو، یەختێك بە 70 سەرنشینەوە لە كەناری ئێڤیای یۆنان ژێرئاو كەوت، هاوكات كونسوڵخانەی عێراقیش لە یونان، دەستیان كردووە بەدواداچوونەكانیان سەبارەت بەو رووداوە بۆ دڵنیابوونەوە لەهەبوون یان نەبوونی كۆچبەری عێراق.