سێ سەرۆکایەتییەکەی عێراق: جەختکرایەوە لەسەر پاراستنی سامانی گشتی و بەرەنگاربوونەوەی گەندەڵی

SNN-

سێ سەرۆکایەتییەی عێراق جەختیان لەسەر پێویستی دانانی یاسای بودجە و گرنگی بەهێزکردنی رێکارەکان بۆ پاراستنی سامانی گشتی و بەرەنگاربوونەوەی گەندەڵی و بەهێزکردنی هەنگاوەکانی چاکسازی.

بە گوێرەی راگەیەندراوێکی سەرۆکایەتی کۆماری عێراق، رۆژی پێنجشەممە 1ی کانوونی یەکەمی 2022، دکتۆر لەتیف رەشید و محەمەد شیاع سودانی سەرۆک وەزیر و محەمەد حەلبوسی سەرۆکی پەرلەمان کۆبوونەوە.

بەپێی ڕاگەیەندراوەکە لە کۆبوونەوەکەدا باس لە بارودۆخی گشتی سیاسی و ئابووری و ئەمنی وڵات کرا، هەروەها ڕێگاکانی پاڵپشتیکردنی حکومەت لە جێبەجێکردنی بەرنامەی کاری خۆی تاوتوێکرا بە شێوەیەک کە دابینکردنی باشترین خزمەتگوزاری بۆ هاووڵاتیان مسۆگەر بکات.

هەروەها، جەختکرایەوە لەسەر پێویستی سوربوون لەسەر سازکردنی هەڵبژاردنی ئەنجومەنی پارێزگاکان لە ساڵی داهاتوودا.

لە راگەیەندراوەکەدا هاتووە، لە کۆبوونەوەکەدا باس لە بارودۆخی ئابووری وڵات کرا، تەئکیدیشکرایەوە لەسەر پێویستی دانانی قانونی بودجە، هەروەها گرنگی بەهێزکردنی ڕێکارەکان بۆ پاراستنی سامانی گشتی و بەرەنگاربوونەوەی گەندەڵی و بەهێزکردنی هەنگاوەکانی چاکسازی.