پەيامی سەرۆک بافڵ بۆ شەهيدی فەرماندە ئاکام عومەر

SNN

ئەمڕۆ شەممە، تەرمی شەهيدی فەرماندە ئاکام عومەر لە ئەڵمانياوە گەڕێندرايەوە شاری سلێمانی و لە مەراسيمێکی تايبەتدا پێشوازی لێکرا، لە مەراسيمەکەدا سەرۆک بافڵ جەلال تاڵەبانی وتارێکی پێشکەشکردوو  رايگەياند: بەداخەوە لە رۆژی ئاڵای کوردستان ماڵئاوای لە تەرمی برای ئازيزمان کاک ئاکام دەکەين.

راشيگەياند: کاک ئاکام بەو تەمەنە گەنجەوە توانی ‌هێزێکی بچووک بکات بەو هێزی کۆماندۆیەی کە ئێستا هەموو نەیار و دوژمنەکانمان لێی تۆقاون، ئەو بووەتە هۆی دروستکردنی ئەو پەیوەندییە تایبەتەی کە ئێستا هێزەکانی کۆماندۆ لەگەڵ هاوپەیمانان هەیەتی.

وتيشی “کاک ئاکام رۆڵی گرنگی هەبوو لە رێکخستنەوەی یەکێتی نیشتمانی کوردستان و ئەو یەکێتییەی هەیە، ئەو یەکێتییەی دەتوانێت یارمەتی عێراق بدات، ئەو یەکێتییەی دەتوانێت یارمەتی خوشک و براکانمان بدات لە هەرچوار پارچەی کوردستان”.

لە وەسفی شەهيد ئاکاميشدا سەرۆک بافڵ دەڵێت “هەزاران شەهیدمان داوە کاک ئاکام یەکێکە لەو شەهیدانە، پیاوێکی ئازا و بە وەفا بوو پیاوێکی بەدین بوو، شانازی بەوە دەکەین بە پاکی گەڕایەوە بۆلای خوای گەورە”.

باسی لەوەشکرد: وەعدمان پێداوە وەک ئەو بە رۆح و خوێنمان بەرگری لە کوردستان بکەین، ناهێڵين ناوی شەهیدەکانمان ون بێت، تا دەگەینە ئامانج دەبێت بەو رێگایەدا بڕۆین، ئەوەی شەهید ئاکام کردی ئێمە بەردەوامی پێدەدەین.